दाङको बंगलाचुली गाउँपालिकामा १५ शय्याको अस्पताल सञ्चालनमा आएको छ । सरकारले प्रत्येक स्थानीय तहमा १५ शय्याको अस्पताल सञ्चालनमा ल्याउने योजनाअनुसार गाउँपालिकाको केन्द्र कमिरेचौरमा रहेको काभ्रे स्वास्थ्यचौकीबाट अस्पतालको सेवा सुरु गरिएको हो ।
अस्पतालको प्रदेशसभा सदस्य अमरबहादुर डाँगीको स्वास्थ्य जाँच गरी मेडिकल अधिकृत वसन्त शाहले शुक्रबार सेवा आरम्भ गरेका थिए । गाउँमै विशेषज्ञ सेवा प्रदान गर्न सरकारले प्रत्येक स्थानीय तहमा १५ शय्याको अस्पताल बनाउने योजना अघि सारेको हो । गाउँपालिका अध्यक्ष भक्तबहादुर वलीका अनुसार अस्पताल सञ्चालनका लागि गाउँपालिकाले आन्तरिक स्रोतबाट डाक्टर, स्वास्थ्य कर्मचारी करारमा राखेको छ । अपुग कर्मचारी काभ्रे स्वास्थ्यचौकीमा कार्यरतलाई नै परिचालन गर्ने अध्यक्ष वलीले जनाए ।
कार्यक्रममा प्रदेशसभा सदस्य डाँगीले जनताको आवश्यकताअनुसार सरकारले काम गरिरहेको बताए । दाङको घोराही उपमहानगरपालिकामा राप्ती स्वास्थ्य विज्ञान प्रतिष्ठान छ भने तुलसीपुर उपमहानगरपालिकामा राप्ती प्रादेशिक अस्पताल छ । जिल्लाका अन्य स्थानीय तहले भने १५ शय्याको अस्पताल सञ्चालनमा ल्याएका छैनन् । -रासस