रुसी राष्ट्रपति भ्लादिमिर पुटिनले कब्जामा रहेको युक्रेनका चार क्षेत्र रुसमा गाभिएको घोषणा गरेका छन् ।
पुटिनले शुक्रबार सम्बोधनको क्रममा युक्रेनका चार क्षेत्र रुसमा गाभिएको र अब उपरान्त ती क्षेत्र रुसको भाग रहेको घोषणा गरेका हुन् । उनले डोनेट्स्क, लुहान्स्क, खेर्सन र जापोरिजझियालाई रुसमा गाभेको बताएका हुन् ।
आक्रामक सम्बोधनमा पश्चिमा राष्ट्रको विरोध गर्दै स्थानीय बासिन्दाले गरेको निर्णयअनुसार रुसमा गाभिएको दाबी गरे । रुसले केही दिन पहिले ‘जनमतसंग्रह’ गरेको थियो ।
त्यसमा सहभागीमध्ये अधिकांशले रुसमा गाभिने पक्षमा मत दिएको दाबी रुसको थियो । सो जनमतसंग्रहलाई युक्रेन तथा संयुक्त राष्ट्रसंघसहित अन्तर्राष्ट्रिय समुदायले आधिकारिकता प्रदान गरेका छैनन् ।
रुसले गराएको ‘जनमतसंग्रह’लाई उनीहरुले ‘तथाकथित’ को संज्ञा दिएका छन् । तर पुटिनले भने युक्रेनको करिब १५ प्रतिशत भूभाग आफ्नो देशमा गाभिएको घोषणा गरेका हुन् । यसअघि सन् २०१४ मा युक्रेनको क्राइमिया पनि रुसले यसैगरी आफूमा गाभेको थियो ।
पुटिनले चार क्षेत्र अब रुसको रहेको र त्यसमा कुनै सम्झौता नहुने बताएका छन् । रुसलाई पश्चिमा देशले टुक्र्याउन चाहेको आरोप पनि उनले लगाए ।
