हिमपातसँगै परेको चट्याङले अवरुद्ध बनेको टेलिफोन सेवा पुनःसञ्चालनमा आएको छ । डडेल्धुराको काफली टावरमा शुक्रबार राति हिमपातसँगै चट्याङ पर्दा भ्वाइसकार्ड र डाटाकार्ड जलेर नष्ट हुँदा टेलिफोन लाइन अवरुद्ध भएको थियो ।
अवरुद्ध सञ्चार सेवा पुन सुरु भएको नेपाल टेलिकम दिपायल राजपुर कार्यालयले जनाएको छ । कार्यालयका सूचना अधिकारी प्रकाशबहादुर चौधरीले दार्चुला, डडेल्धुरा, बैतडी, बझाङ, बाजुरा, अछाम तथा डोटीमा सञ्चार सम्पर्क पुनःसञ्चालन आएको जानकारी दिए ।
शुक्रबार साँझदेखि आइतबार दिनभरि टेलिफोनसँगै इन्टरनेट सेवा पूर्ण अवरुद्ध हुँदा यहाँका पहाडी जिल्लामा बैंकिङ कारोबार पनि ठप्प भएको थियो ।
हिमपातले यहाँको जनजीवन भने प्रभावित बनेको छ । हिमपातसँगै बढेको चिसोले ससाना बालबालिका तथा वृद्धवृद्धमा निमोनियाँ, रुघाखोकी, दम, ज्वरोलगायत विभिन्न रोगले सताउन थालेको जोरायल गाउँपालिका ५ का प्रकाश रावलले जानकारी दिए । -रासस