सिमरामा सम्पन्न मधेस प्रदेशस्तरीय दोस्रो रामनारायण मिश्र फुटबल प्रतियोगिताको उपाधिउपाधि बारा जिल्लाले हात पारेको छ।
शनिबार राति सम्पन्न प्रतियोगिताको फाइनल खेलमा प्रतिस्पर्र्धी रौतहटलाई शून्यका बिरुद्ध दुई गोल अन्तरले पराजित गर्दै उपाधि हात पार्न बारा सफल भएको हो।
मधेस प्रदेश फुटबल संघको आयोजना र बारा जिल्ला फुटबल संघको सहआयोजनामा भएको प्रतियोगितामा विजेता बारालाई कार्यक्रममा प्रमुख अतिथि पूर्व उपप्रधान एवं गृहमन्त्री विमलेन्द्र निधिले रु. ५० हजार, उपविजेता रौतहटलाई रु ३० हजार नगद हस्तान्तरण गरेका थिए।
मधेस प्रदेशको शिक्षा तथा समाज कल्याण मन्त्रालयको आर्थिक सहयोगमा असार ११ गतेदेखि बाराको सिमरामा जारी प्रतियोगिता शनिबार राति सम्पन्न भएको हो।
प्रतियोगिताको बेष्ट किपर नसरोज धामी, बेष्ट डिफेन्स बाराका श्याम चौधरी, बेष्ट मिड फिल्ड रौतहटका बिपिन मगर, बेष्ट फरवार्ड सिरहा सुजन पुलामी, हाइस्कोरर सागर चौधरी, बेष्टकोच बाराका उमेश श्रेष्ठलाई रु. ५ हजारका दरले तथा मस्ट भ्यालुएबलतर्फ बाराका बिबेक चौधरीले रु. १० हजार नगद पाएका छन्।
समापन कार्यक्रममा कांग्रेस नेता विमलेन्द्र निधिले २००७ सालको क्रान्तिमा रामनारायणको योगदानको चर्चा गर्दै उहाँ जनकपुर चुरोट कारखानाको स्थापना तत्कालीन उद्योग मन्त्री मिश्रको पहलमा भएको स्मरण गरे।
११औं राष्ट्रिय फूटबल मधेश प्रदेशमा आयोजना गर्नका लागि आफ्नो तर्फबाट पहल गर्ने निधिले बताए। उनले खेलकूदलाई आफूले अन्य पेशाभन्दा फरक रुपमा लिएको उल्लेख गर्दै यसले अनुशासनको पाठ पढाउने र नेपाललाई अन्तर्राष्ट्रिय जगतमा चिनाउनका लागि मद्धत गर्ने बिश्वास व्यक्त गरे।
मधेस प्रदेश फुटबल संघका सभापति नेपाल कार्कीको सभापतित्वमा सम्पन्न प्रतियोगिता समापन कार्यक्रममा एन्फा उपाध्यक्ष दाबा लामा,जतिपुर सिमरा उपमहानगरपालिकाका प्रमुख राजन पौडेललगायतले खेलकूद क्षेत्रको विकासका लागि सरकारले सहयोग गर्नुपर्नेमा जोड दिएका थिए।
