राजधानीमा जारी सहिद स्मारक ए डिभिजन लिग फुटबलमा फ्रेन्ड्स क्लब र मछिन्द्र फुटबल क्लबले बराबरी खेल्दै अंक बाँडेका छन्।
बिहीबार त्रिपुरेश्वरस्थित दशरथ रंगशालामा भएको खेलमा फ्रेन्ड्स र मछिन्द्रले २–२ गोलको बराबरी खेल्दै एक एक अंक बाँडेका हुन्। खेलको ६८ औं मिनेटमा प्रकाश बुढाथोकीले गोल गर्दै फ्रेन्ड्सलाई सुरुआती अग्रता दिलाएका थिए। तर, खेलको ७१ औं मिनेटमा आफिज ओलावालेले गोल गर्दै मछिन्द्रलाई १–१ गोलको बराबरीमा ल्याए।
त्यस्तै खेलको ७८ औं मिनेटमा राफिक अमिनुले गोल गर्दै फ्रेन्ड्सलाई २–१ को अग्रता दिलाए भने ८३ औं मिनेटमा ओलावालेले व्यक्तिगत दोस्रो गोल गर्दै मछिन्द्रलाई २–२ गोलको बराबरीमा ल्याएका थिए। बराबरीसँगै मछिन्द्रले १९ खेलमा ३१ अंक जोडेको छ भने फ्रेन्ड्सले १९ खेलमा २१ अंक जोडेको छ।
त्यस्तै बिहीबार नै च्यासल मैदानमा भएको खेलमा संकटा क्लवसंग २–२ को बराबरी खेल्दै मनाङ मस्र्याङ्दी क्लव अंक बाँड्न बाध्य भएको छ। मनाङको लागि कोफी कुडोले दुई गोल गरे। संकटाका युसेफ एट्रिस र मनिष डाँगीले एक एक गोल गरे। खेलको १९ औं मिनेटमा कोफीले गोल गर्दै मनाङलाई सुरुआती अग्रता दिलाएका थिए।
तर, ४४ औं म्मिनेत्मा युसेफले गोल गर्दै संकटालाई १–१ गोलको बराबरीमा ल्याए। खेलको ४५ औं कोफीले व्यक्तिगत दोस्रो गोल गर्दै मनाङलाई २–१ को अग्रता दिलाए । त्यसपछि खेलको ५२ औं मिनेटमा मनिषले गोल गर्दै संकटालाई २–२ गोलको बराबरीमा ल्याए। यस बराबरीसँगै मनाङले १९ खेलमा २३ अंक जोडेको छ। संकटाले १९ खेलमा २२ अंक जोडेको छ।
