कागेश्वरी मनोहरालाई खेलकुदको शहर बनाउने महत्वाकांक्षी योजनालाई नेपाली खेलकुदको सवैभन्दा महत्वपूर्ण निकाय राष्ट्रिय खेलकुद परिषदले सहयोग गर्ने प्रतिबद्धता सहित समर्थनको हात अगाडि बढाएको छ।
खेलकुदका लागि आवश्यक पर्ने पूर्वाधार निर्माण गर्ने र खेलकुदको माहोल बनाउदै विशिष्ट योजना सहित अगाडि बढ्ने तयारीमा रहेको कागेश्वरी मनोहरा र राष्टिय खेलकुद परिषदवीच खेलकुद नगरीको अभियानलाई सार्थक बनाउन आवश्यक गृहकार्यसहित अगाडि बढ्ने सैद्धान्तिक सहमति भएको छ।
त्रिपुरेश्वरस्थित राष्ट्रिय खेलकुद परिषदको कार्यालयमा शुक्रवार आयोजित कार्यक्रममा राखेप सदस्य सचिव टंकलाल घिसिङले कागेश्वरी मनोहरा नगरपालिकाले देखेको सपना उत्कृष्ट भएकाले यसलाई सहयोग गर्न आफु तत्पर रहेको बताए।
भिन्न खेलका पूर्वाधार तयार पार्ने, राष्टिय र अन्तराष्टिय स्तरका प्रतियोगिता संचालन गर्ने र खेलाडी उत्पादन र तयार गर्ने अभियानमा राखेपले विशेष साथ र सहयोग गर्ने प्रतिबद्धता पनि सो अवसरमा ब्यक्त गरियो।
सो अवसरमा मेयर उपेन्द्र कार्कीले कागेश्वरी मनोहराले खेलस्थल निर्माणका लागि आवश्यक जग्गा उपलब्ध गराउने प्रतिबद्धता ब्यक्त गरे। कागेश्वरी मनोहराले उपलब्ध गराएका जग्गाको अध्ययन गरी डिटेल प्रोजेक्ट रिर्पोट तयार गरी अगाडि बढ्नका लागि राष्ट्रिय खेलकुद परिषदले आवश्यक बजेट विनियोजन गर्ने पनि सदस्य सचिव घिसिङले जानकारी दिए।
कागेश्वरी मनोहरा नगरपालिकाका मेयर उपेन्द्र कार्कीले खेलकुद नगरी बनाउने महाअभियानमा राष्ट्रिय खेलकुद परिषदलाई जोड्न पाउदा आफुलाई गर्वको अनुभुति भएको बताए। राखेप सदस्य सचिवको खेलकुदप्रतिको लगाव र चिन्ताका कारण पनि आफनो अभियान सोचे भन्दा सफल हुने मेयर कार्कीको विश्वास छ। कार्यक्रममा राखेपका विभिन्न शाखाका प्रमुखहरु, कागेश्वरी मनोहरा नगरपालिकाका प्रमुख प्रशासकीय अधिकृत अजय बडतौला, वडा नं ६ का वडा अध्यक्ष प्रकाश फुयाल, वडा नं ७ का वडा अध्यक्ष भीम थापा, नगरपालिकाको इन्जिनियरि शाखा, खेलकुद नगरी संभाब्यता अध्ययन तथा समन्वय समितिका पदाधिकारी लगायतको उपस्थिति थियो।
यसैवीच कागेश्वरी मनोहरा नगरपालिकाले आगामी मे मा काठमाडौंमा आयोजना हुने एसिसि मेन्स प्रिमियर लिग क्रिकेट प्रतियोगिताका खेलहरु मुलपानी क्रिकेट मैदानमा पनि संचालन हुने विषयले आफुलाई थप हर्षित बनाएको बताउदै सो प्रतियोगिता सफल बनाउनका लागि नगरपालिकाले सवै खालका सहयोग गर्ने प्रतिबद्धता पनि ब्यक्त गरेका छन्।