एपीएफ क्लब प्रधानमन्त्री कप (पीएम कप) एकदिवसीय पुरुष क्रिकेट प्रतियोगिताको फाइनलमा प्रवेश गरेको छ।
त्रिवि क्रिकेट मैदानमा बुधबार भएको सेमिफाइनलमा नेपाल पुलिस क्लबलाई ३० रनले पराजित गर्दै एपीएफ उपाधि नजिक पुगेको हो।
अब उपाधिका लागि एपीएफले बागमती प्रदेश र त्रिभुवन आर्मी क्लबको विजेतासँग खेल्नेछ। बिहीबार हुने दोस्रो सेमिफाइनलमा बागमती र आर्मी भिड्ने छन्।
एपीएफले दिएको २ सय ४ रनको लक्ष्यसहित जवाफी ब्याटिङ गरेको पुलिस ४९ ओभर २ बलमा अलआउट हुँदै १ सय ७३ रनमा समेटियो। यसअघि टस हारेर पहिले ब्याटिङ गरेको एपीएफले ५० ओभरमा ९ विकेट गुमाएर २ सय ३ रन बनाएको थियो।
एपीएफ प्रतियोगीतामा अपराजित रहदै फाइनलमा पुगेको हो। समूह ’ए’ मा रहेको एपीएफले ४ खेलमा ४ जितसहित समूह विजेता बनेर सेमिफाइनल खेलेको हो। प्रतियोगिताको विजेताले १० लाख पाउने छन्। यस्तै उपविजेताले ५ लाख पाउने नेपाल क्रिकेट संघ क्यानले जनाएको छ।