१३औं दक्षिण एसियाली खेलकुद अन्तर्गत आजदेखि फुटबलका खेलहरु शुरु हुँदैछन्। दशरथ रंगशालामा आज हुने पहिलो खेलमा बंगलादेश र भुटान खेल्दैछन्। यो खेल दिउँसो एक बजे हुनेछ। साँझ पाँच बजे माल्दिभ्स र श्रीलंका आमने सामने हुनेछन्।
नेपालको खेल भने भोलीमात्र रहेको छ। खेलअघि आयोजित प्रिम्याच कन्फरेन्समा सहभागी सबै टिमले तयारी सकिएको जनाएको थिए। तर माल्दिभ्सका प्रशिक्षक पिटर सेग्राटले भने खेलतालिका प्रति आपत्ती जनाएका थिए।
आज भलिबलतर्फ कास्य पदकका लागि खेल हुँदैछ।
सेमिफाइनलमा भारतसँग पराजित भएको श्रीलंका र पाकिस्तानसँग पराजित भएको बंगलादेश कास्य पदकका लागि प्रतिष्पर्धा गर्दैछन्। महिलातर्फ श्रीलंका र माल्दिभ्स कास्य पदकका लागि खेल्दैछन्। महिलातर्फको सेमिफाइनलमा श्रीलंका नेपालसँग र भाल्दिभ्स भारतसँग हारेको थियो।
आजदेखि करातेका खेलहरु संचालन हुँदैछन्। आज करातेमा आठ स्वर्णका लागि छिनोफानो हुनेछ। यस्तै तेक्वान्दोमा १० पदकको छिनोफानो हुनेछ।
आज पोखरामा ब्याडमिन्टनका खेलहरु संचालन हुनेछन्। टिम इभेन्टसको सेमिफाइनल खेलहरु हुँदैछन्। आज विहान नेपालको पुरुष र महिला दुबै टिमले फाइनल प्रवेशका लागि श्रीलंकासँग प्रतिष्पर्धा गर्दैछन्। यस्तै आज टेनिस, खोखो, महिला क्रिकेट, फेन्सिङ, गल्फ, कबड्डी, स्क्वास, टेबल टेनिस, उसु, ट्रायाथलनका खेलहरु संचालन हुँदैछन्।
