प्रधानमन्त्री पुष्पकमल दाहाल ‘प्रचण्ड’ले विश्वविद्यालयको पाठ्यक्रमलाई समयसापेक्ष बनाउन सरकार प्रतिवद्ध रहेको बताएका छन्।
नेपाल संस्कृत विश्वविद्यालयको पाँचौँ दीक्षान्त समारोहलाई बुधबार दाङमा सम्बोधन गर्दै विश्वविद्यालयको पाठ्यक्रमलाई समयसापेक्ष बनाउने कुरालाई नेपाल सरकारले आफ्नो नीति तथा कार्यक्रमभित्र समेटेको बताए।
वर्तमान सरकार नेपालभित्रै गुणस्तरीय शिक्षाको विकास एवम् प्रवद्र्धनका लागि विश्वविद्यालयहरूबिच प्रभावकारी समन्वय र प्रतिस्पर्धालाई बढावा दिन चाहेको उनले बताए। विद्यार्थी तथा विश्वविद्यालयको जनशक्तिको क्षमता विकास हुने गरी सरकारी क्षेत्रका अध्ययन, अनुसन्धानका कार्यहरू र सरकारी कार्यक्रमका लागि आवश्यक परामर्श सेवा विश्वविद्यालयमार्फत गर्ने व्यवस्था मिलाउन पनि सरकार प्रतिवद्ध रहेको प्रधानमन्त्रीको भनाइ छ।
प्रधानमन्त्री प्रचण्डले नयाँ–नयाँ खोज, आविष्कार तथा विकासका आधारहरू सबै शिक्षामा नै निर्भर हुने भएकाले यस विश्वविद्यालयबाट राष्ट्रले ठूलो अपेक्षा राखेको बताए। विविध कारणले गर्दा संस्कृत विश्वविद्यालयको दीक्षान्त समारोह विगत बाह्र वर्षयता सम्पन्न हुन सकेको भन्दै प्रधानमन्त्री प्रचण्डले छात्रछात्राहरूको वर्तमान र भविष्यसँग गाँसिएका यस्ता कार्यक्रमहरूलाई समयमै आयोजना गर्न विश्वविद्यालय प्रयत्नरत रहनुपर्ने समेत उल्लेख गरे।
१२ वर्षपछि भएको दीक्षान्त समारोहमा विद्यावारिधि उपाधि हासिल गरेका १२० जना, आचार्य तह उत्तीर्ण १४५ जना, शास्त्री तह उत्तीर्र्ण १६३, आयुर्वेद स्नातक उत्तीर्ण ५७ र एक वर्षे शिक्षा शास्त्री उत्तीर्ण गरेका ९० जना दीक्षीत भएका छन्। यस्तै समारोहमा प्रत्येक वर्ष विभिन्न विधामा उत्कृष्ट हुने विद्यार्थीहरुलाई कुलपति समेत रहेका प्रधानमन्त्रीले विभिन्न पदक तथा विभुषणबाट विभुषित समेत गरेका थिए।
