प्रधानमन्त्री शेरबहादुर देउवाले अर्ली इलेक्सनबारे सत्ता गठबन्धनका नेताहरुसँग परामर्श गर्ने बताएका छन्।
अर्ली इलेक्सनको बहस चलिरहेको बेला धनगढीमा आयोजित पत्रकार सम्मेलनमा देउवाले यसबारे सत्ता गठबन्धनसँग छलफल गर्ने बताएका हुन्। ‘गठबन्धनको सरकार छ, मैले एक्लैले भनेर हुँदैन’, प्रधानमन्त्री देउवाले भने, गठबन्धनले जे भन्छ, त्यही हुन्छ।’
पत्रकार सम्मेलनमा प्रधानमन्त्री देउवाले एमसिसी पारित गरिने बताए। ‘एमसिसी पास हुन्छ,’ प्रधानमन्त्री देउवाले भने, ‘यो ठूलो अनुदान हो, ऋण होइन।’ उनले एमसिसीबारे झुठा प्रचार भइरहेको पनि बताए। एमसिसी नेपालको कानुनभन्दा माथि नरहेको भन्दै नेपालकै कानुनअनुसार नै एमसिसी अगाडि बढ्ने उनले बताए।
कांग्रेस सभापतिसमेत रहेका प्रधानमन्त्री देउवाले पार्टीको १४ औं महाधिवेशन प्रक्रिया अगाडि बढिरहेको बताए। महाधिवेशन सर्नेबारे सोधिएको प्रश्नमा देउवाले यसबारे आफूलाई भन्दा निर्वाचन समितिलाई थाहा हुने जवाफ दिए।
सुदूरपश्चिमको बाढी प्रभावित क्षेत्र अवलोकन गर्न आएका प्रधानमन्त्री देउवाले काठमाडौं फर्किएलगत्तै राहत प्याकेज घोषणा गर्ने बताए। प्रधानमन्त्री देउवा बाढीपहिरो पीडितको अबस्थाबारे बुझ्नका लागि बिहिबार सुदूरपश्चिम क्षेत्र गएका थिए।
