प्रमुख सत्तारुढ दल नेपाल कम्युनिस्ट पार्टी ( नेकपा) घर झगडामा व्यस्त रहँदा अर्काे प्रमुख विपक्षी दल कांग्रेस चाँही के गर्दैछ भन्ने आम मानिसले चासो राख्न थालेका छन् ।कांग्रेसको भित्रको अवस्था पनि नेकपाको जस्तै नै हो तर उ विवादलाई थाँती राखेर अहिले चुपचाप बसिरहेकाे छ।
नेकपामा जस्तो पत्रको सवालजवाफको स्थिति कांग्रेसमा देखापरेको छैन । तर त्यहाँ पनि सभापति शेरबहादुर देउवाले एकलौटी रुपमा गर्ने नियुक्ति र निर्णयले बेलाबख असहज स्थिति उत्पन्न गराउने गरेको छ। देउवाले रिक्त विभाग र संगठनमा आफू निकटका व्यक्तिलाई छानीछानी नियुक्ति गर्ने विषयले किचलो उत्पन्न गराउने गर्दछ । नेकपाको घर झगडाले कांग्रेस नेतृत्व केही नरम अवश्य भएका छन् ।
एउटा पार्टीभित्र नेता पिच्छेको समूहले गर्दा सधै जसो विवाद हुने गरेको छ । यो नेकपामा मात्र होइन कांग्रेस लगायतका अन्य पार्टीमा यस्तै समस्या छ ।
बरिष्ठ नेता रामचन्द्र पौडेलपक्षले सभापतिबाट भएका मनलाग्दी क्रियाकलापको विरोध गर्ने गरेका छन् । १४ औं महाधिवेशनको तयारीमा रहेको कांग्रेसमा आगामी नेतृत्वका लागि दौडधुप र क्याम परिवर्तनका खेलहरु भई रहेका छन् ।
थुप्रै पटक सभापति भईसकेका देउवाले फेरि पनि इच्छा देखाएका छन् । उपसभापति विमलेन्द्र निधिलाई आगामी नेतृत्वका लागि पटक पटक सहयोग गर्ने आश्वासन दिएका सभापति देउवाबाट पुनःसभापतिको इच्छा व्यक्त भएपछि निधि उनको उधाराे आश्वासनकाे पछि नलागेर आफैंं कस्सिएका छन् ।
यस्तै गरी पौडेल पक्षमा पनि थुप्रै व्यक्तिले नेतृत्वका लागि आकांक्षा राखेका छन् । शशांक कोइराला, शेखर कोइराला, प्रकाशमान सिंह,कल्याण गुरुङ, सुजता कोइरालाले नेतृत्वका लागि दावी गरेका छन् । महाधिवेशन नै हुने पक्का भएपछि नेतृत्वका आकांक्षी अझ बढ्ने पक्का छ ।दोस्रो पुस्ताका नेताहरुको चाहना र सक्रियताले गर्दा नेताहरु देउवा र पौडेललाई नै अप्ठयारो अवस्था सिर्जना भएको छ ।
अहिले दुई विपरीत ध्रुवमा देखिएका देउवा र पौडेल नै कालान्तरमा मिल्नुपर्ने अवस्था आउन सक्ने सम्भावना पनि एकातिर जीवितै छ । देउवालाई साथ दिँदै आएका निधिले पनि सभापतिमा दावी गरेपछि उनी नयाँ सारथीको खोजीमा छन् ।
देउवा र पौडेलको समिकरण अहिले चर्चामा मात्रै सिमित छ ।पाँच दशकदेखिका सहयात्री दुबैलाई दोस्रा पुस्ताले पेल्न खोजे एक ठाउँमा उभिनुपर्ने बाध्यता भने हुन सक्छ । दुबै नेताको सबैभन्दा कठीन खुट्किलो सभापतिको उम्मेदवार को हुने भन्ने हो ।त्यसैले सहकार्य त्यति सजिलो भने छैन । देउवा र पौडेल मिल्दा पार्टीभित्रको समस्या आधा समाधान हुने विश्वास गरिन्छ ।