तत्कालीन नेकपा एमाले र एमाओवादीबीच पार्टी एकीकरणपछि जन्मेका बिवादमध्ये केही मत्थर भए केही उस्तै छन्। दुई पार्टी एक बनाउने काममा जुटेका दुई अध्यक्ष केपी ओली र पुष्पकमल दाहाल अहिले जटिल मोडमा आइपुगेका छन्।
विभिन्न विभाग, तहको नेतृत्व बाँडफाँडमै अल्झिएको नेकपा स्कुल विभागको नेतृत्व भने भालुको कन्पट भएकाे छ। जसका नेतृत्वका लागि सुरुवातीमा तत्कालीन एमालेका ईश्वर पोखरेल र एमाओवादीका नारायणकाजी श्रेष्ठ प्रमुख दाबेदारका रुपमा अघि आएका थिए।
अहिले भने स्कुल विभागको नेतृत्वका लागि ८ नेताले दाबी गरेका छन्। यसले पनि झल्काउँछ व्यक्ति कति पद लोलुप छ भन्ने।
नारायणकाजी र ईश्वरको दाबीबीच घनश्याम भुसालले पनि दाबी गरे। त्यसमा झलनाथ खनाल झन् के कम उनले पनि स्कुल विभागको जिम्मेवारी आफैंले पाउनुपर्ने दाबी पेस गरे। विभिन्न व्यक्तिसँगको कुराकानी तथा आफ्नो भाषणमा आजभोलि उनले भन्ने गरेका छन्, 'स्कुल विभाग प्रमुख बनाइए जिम्मेवारी लिन तयार छु।'
मौखिक, लिखित सुझाव संकलनका क्रममा नेकपा महासचिव विष्णु पौडेलसमक्ष युवराज ज्ञवाली, वेदुराम भुसाल, देवेन्द्र पौडेल र राम कार्कीले पनि स्कुल विभागको नेतृत्वमा रुचि देखाएकाे छन्।
यसरी स्कुल विभागको प्रमुखको दाबेदारमा नारायणकाजी श्रेष्ठ, ईश्वर पोखरेल, घनश्याम भुसाल, झलनाथ खनाल, वेदुराम भुसाल, देवेन्द्र पौडेल, राम कार्की र युवराज ज्ञवाली गरी ८ जना देखिएकाे हुन् ।
यी दावेदारमध्ये वेदुराम र युवराज यसअघि नै तत्कालीन एमालेमा स्कुल विभाग प्रमुख भइसकेका नेता हुन्। घनश्याम भने तत्कालीन एमालेको स्कुल विभाग उपप्रमुख भएका नेता हुन्।
सचिवालय सदस्यहरुले नै बिभागीय प्रमुखमा दाबी गरेपछि नेकपाभित्र एकथरी नेताहरुले सचिवालयका कुनै पनि नेतालाइ बिभागकाे प्रमुख बनाउन नहुने तर्कसमेत शुरु भएकाे छ।
कार्यविभाजन कहिले ?
नेकपा नेताहरुको कार्य विभाजनलगायत एकीकरणका बाँकी काम टुंगो लगाउन भोलि (बुधबार) केन्द्रीय सचिवालय बैठक बस्ने भएको छ। तर, यसले निकास निकाल्ला भन्ने पार्टी नेतृत्वसँग पनि विश्वास छैन। अध्यक्ष केपी ओलीले शीर्ष नेताहरुसँग परामर्श गर्न समय चाहिएकाले आज (मंगलबार) बस्ने भनिएको बैठक भोलिका लागि सारिएको महासचिव पौडेलले जनाए।
उनका अनुसार बैठकमा उनी आफैंले कार्य विभाजनको प्रस्ताव पेस गर्ने तयारी छ। पौडेलले यसबीचमा स्थायी कमिटी तथा केन्द्रीय कमिटी सदस्यहरुसँग तीन विकल्पसहित आफूले जिम्मेवारी लिन चाहेको विभाग, भूगोल वा जनसंगठनको रुचिबारे लिखित तथा मौखिक सुझाव संकलन गरेका छन्। पौडेलले आएका सुझाव अध्यक्षद्वय ओली र दाहाललाई सुनाइसकेका छन्। पार्टीको कार्यविभाजन कहिले भन्ने निर्क्योल नहुँदा नेता-कार्यकर्तामा निराशा छाएको छ।
ओलीले थाले परामर्श
सिंगापुरबाट एक साताको स्वास्थ्य उपचार गरी स्वदेश फर्किएलगत्तै नेकपा अध्यक्ष ओलीले राजनीतिक सक्रियता बढाएका छन्। पार्टीमा विभाग प्रमुखहरुको टुंगो लगाउनुअघि ओलीले शीर्ष नेताहरुसँग परामर्श थालेका हुन्। अर्का अध्यक्ष दाहालसहित माधव नेपाल, महासचिव पौडेल र वामदेव गौतमलगायत नेताहरुसँग ओलीले परामर्श थालेको स्रोतको भनाइ छ। आज दिनभरको प्रयासपछि भोलि (बुधबार) सचिवालय बैठकले जिम्मेवारी बाँडफाँड टुंगो लगाउने बताइएकाे छ।
पूर्वएमालेको भागमा परेको १८ र पूर्वमाओवादीको भागमा परेको १४ विभागको जिम्मेवारीको विषय पेचिलो बन्दै गएपछि सचिवालय बैठक पटक-पटक सर्दै आएको थियो ।