पूर्व उपप्रधानमन्त्री एवं नेपाली कांग्रेसका नेता विमलेन्द्र निधिले सर्वसाधारणको जीवनस्तर उकास्ने सहज र लोकतान्त्रिक माध्यम सहकारी भएकोले यो अभियान अघि बढाउनका लागि एक भन्दा बढी सहकारी बैंकको आबश्यकतामा जोड दिएका छन्।
काठमाडौंको टोखामा मुख्य कार्यालय रहेको कान्तिपुरी बहुउद्देश्यीय सहकारी संस्थाको २१ औं बार्षिक साधारण सभा तथा संस्थाको नवनिर्मित भवनको शुक्रबार उद्घाटन गर्दै निधिले देशभरका करिब ३० हजार सहकारी संस्थामा आबद्ध लाखौं सदस्यहरुको जीवनस्तर उकास्न एउटा मात्र सहकारी बैंक पर्याप्त नभएको बताए। उनले एउटामात्र सहकारी बैंकले सहकारी अभियान अघि बढाउन नसक्ने ठोकुवा गरे।
सहकारीमा आबद्ध कम्युनिष्ट बिचारधारा बोकेकाहरु थप सहकारी बैंक स्थापनाको पक्षमा नरहेको भन्दै यस्तो सोचलाई कांग्रेस पूर्ब उपसभापति समेत रहेका निधिले अधिनायकवादी सोचको संज्ञा दिए। कम्युनिष्टहरुले अर्को सहकारी बैंक खोल्न नदिन बखेडा निकालेको भन्दै उनले सहकारी अभियान अघि बढाउन कांग्रेस नेतृत्वको सरकारका पालामा महत्वपूर्ण निर्णयहरु भएको स्मरण गर्दै नेता निधिले जनताको सहभागिता रहने यो अभियान लोकतन्त्रवादी सिद्धान्तको उपज भएको उल्लेख गरे। सहकारी बैंक स्थापनाका लागि आफ्नो तर्फबाट सक्दो सहयोग गर्ने उनले प्रतिबद्धता जनाए।
कार्यक्रममा कान्तिपुरी सहकारी संस्थाका अध्यक्ष मनोज भण्डारी, कोषाध्यक्ष राजकुमार बिष्ट लगायतले संस्थाका गतिबिधिमाथि प्रकाश पारेका थिए।
कार्यक्रममा सहकारीले संस्थाका बृद्धबृद्धा, एकल महिला तथा उत्कृष्ट विद्यार्थीहरुलाई नगदसहित सम्मान गरेको थियो।