लामो गन्तब्य नपाएको भन्दै आलोचनामा परेको राष्ट्रिय ध्वजाबाहक नेपाल वायुसेवा निगम (नेपाल एयरलाइन्स) ले यही भदौ १२ गतेदेखि जापानको ओसाका उडान गर्ने भएको छ।
जापान उडानबारेको अन्यौललाई चिर्दै निगमले ओसाका गन्तव्यमा सिधा उडानको औपचारिक तालिका सार्वजनिक गरेको हो। ओसाका उडानका लागि सम्पूर्ण तयारी भएको निगमले जानकारी दिएको छ। निगमका अध्यक्ष मदन खरेलले आगामी २९ अगष्ट २०१९ अर्थात भदौ १२ गतेदेखि जापानमा नियमित उडानको तयारी गरिएको बताए।
“भदौ १२ देखि जापानको ओसाका पहिलो ‘सेडुवल फ्लाइट’ गर्दैछौँ, त्यसका लागि सम्पूर्ण तयारी गरिसकेको मिडियामार्फत आम सर्वसाधारणलाई जानकारी गराउन चाहन्छौँ, जापान उडान हुन्छ कि हुँदैन भन्ने विभिन्न आशङ्का र अन्योलबारे स्पष्ट पार्नको लागि कार्यक्रम गरिएको हो”, उनले भने। त्रिभुवन अन्तरराष्ट्रिय विमानस्थलबाट ओसाका कन्साई इन्टरनेशनल एयरपोर्टमा निगमले २७४ यात्रु क्षमताको वाइड बडी ए ३३०–२०० जहाजबाट नियमित उडान गर्ने योजना छ। साताको तीन मङ्गलबार, बिहीबार र शनिबार काठमाडौँ–ओसाका नियमित उडान गरिनेछ।
निगमले ओसाका रुटका लागि एकतर्फी काठमाडौँ–ओसाकाको मूल्य अभिवृद्धि करसहित ३६ हजार ९९९ नयाँ भाडादर निर्धारण गरेको छ। उक्त गन्तव्यमा दुईतर्फी भाडा रु ७२ हजार ८१४ कायम गरिएको छ।
यो प्रवद्र्धनात्मक भाडा दर हो। एक महिनापछि नयाँ भाडादर कायम गरिने निगमले जनाएको छ। काठमाडौँदेखि ओसाका उडानको समयावधि छ घण्टाको छ भने ओसाका–काठमाडौँ साढे सात घण्टाको उडान हुनेछ।
शुरुका महीनामा केही समस्या भए पनि दशैँ, तिहारदेखि व्यावसायिक सफलता पाउने निगमले प्रक्षेपण गरेको छ। जापान सिधा उडान भएपछि पर्यटकको आगमन बढ्ने विश्वास गरिएको छ। कम्तीमा पनि वार्षिक ४० हजार पर्यटक भित्र्याउने निगमले जनाएको छ। नेपाल भ्रमण वर्ष २०२० अभियानलाई लक्षित गर्दै जापान उडानको योजना बनाइएको पनि अध्यक्ष खरेलले बताए।
नेपाल पर्यटन बोर्डका अनुसार जापानबाट सन् २०१८ मा २९ हजार ८१७ पर्यटन नेपाल आएका छन्। सन् २०१७ मा २७ हजार ३२६ पर्यटक नेपाल भ्रमणमा आएका थिए।