कर्णाली प्रदेश सरकार आगामी आव ०७६/७७ को नीति तथा कार्यक्रम निर्माणको तयारीमा जुटेको छ ।
आगामी आवमा यहाँका जनताको वास्तविक आवश्यकतालाई सम्बोधन हुने खालको नीति तथा कार्यक्रम ल्याउने उद्देश्यले दुर्गम जिल्लामा पुगेर जनताको सुझाव लिइएको कर्णाली प्रदेश सरकारका प्रवक्ता एवं भूमि व्यवस्था, कृषि तथा सहकारीमन्त्री विमला केसीले जानकारी दिइन् । “हामी गरिब र भूमिहीनको पक्षमा नीति तथा कार्यक्रम बनाउँदैछौँ,” उनले भनिन्, “यसका लागि जनस्तरबाटै सुझाव लिन र नागरिकलाई नजीकको सरकारको अनुभूति गराउन दुर्गममा पुगेका हौँ ।
भूगोलको अध्ययनसमेत गरेको बताउँदै उनले अनुगमन गरिएका चालू आवका कार्यक्रमहरुको प्रभावकारिताबारे समीक्षा गरी नयाँ मोडेलबाट अघि बढ्ने बताइन् । उनका अनुसार भूमि व्यवस्था मन्त्रालयले सुर्खेत, दैलेखसहित साबिक कर्णालीका ५ जिल्लाबाट सुझाव लिइसकेको छ । डोल्पालाई उपल्लो, मध्य र तल्लो डोल्पामा विभाजन गरी कार्यक्रम लागू गरिने भूमि व्यवस्था, कृषि तथा सहकारी मन्त्रालयले योजना बनाएको जनाइएको छ । भूगोल र बस्तीको अवस्था हेरेर स्थानीय आवश्यकता र प्रस्ताव निर्माण गर्न नसक्ने लक्षितवर्गको समस्यालाई सहजै समाधान गर्ने ढाँचाबाट कार्यक्रम निर्माण गरिने मन्त्री केसीको भनाइ छ ।
त्यस्तै पकेट विकासका आधारलाई कार्यान्वयनमा ल्याएर स्थानीय आवश्यकता र भूगोललाई समेटेर प्रदेशले विकास गर्ने नीति अवलम्बन गर्ने जनाइएको छ ।
-रासस