नेपाल एसोसिएसन अफ टुर एण्ड ट्राभल एजेण्ट्स (नाट्टा)को अध्यक्षमा अच्युत गुरागाईं निर्वाचित भएका छन्। शुक्रबार भएको मतदानमा दुई प्रतिस्पर्धीलाई पराजित गर्दै गुरागाईं अध्यक्षमा निर्वाचित भएका हुन्।
प्रतिस्पर्धी नेकपा निकट भिमप्रसाद पन्त र निहीका शाहलाई पराजित गर्दै अध्यक्षमा निर्वाचित भएका गुरागाईं कांग्रेस निकट हुन्। यस्तै नाट्टाको वरिष्ठ उपाध्यक्षमा विनय बस्नेत, उपाध्यक्षमा थोपा थापा, महासचिवमा सुधिर कुमार उपाध्याय, सचिवमा जिस्वा तुलाधर श्रेष्ठ, कोषाध्यक्षमा कुमार मणि थपलिया तथा सहकोषाध्यक्षमा फुडोमा शेर्पा निर्वाचित भएका छन्।
पदाधिकारी र सदस्यमा फरक समूहबाट निर्वाचित भएपनि पर्यटन क्षेत्रको विकासका लागि सबैसंग सहकार्य गरी अघि बढ्ने बताए। अध्यक्ष गुरागाईले चुनावमा गरेका प्रतिवद्धताहरु कार्यान्वयन गर्ने उल्लेख गर्दै आफ्नो टिमले पर्यटन प्रवर्द्धनमा टेवा र्पुयाउने बताए।
नबनिर्बाचित अध्यक्ष गुरागाईंले नाट्टामा बिभिन्न पदमा चार कार्यकाल बसेर काम गरिसकेका छन्। पर्यटन क्षेत्रमा २७ वर्षको उनको अनुुभब छ।
अहिले यो क्षेत्रमा टिकेटिङ र टुरमा अस्वस्थ प्रतिस्पर्धा अनि झुक्याएर व्यापार गर्ने, कम्पनी नै दर्ता नगरी काम गर्ने समस्या छन्। आफूले ती समस्याको हल गर्ने उनले बताए।
भिजिट नेपाल २०२० को सन्दर्भमा नेपाल एयरलाइन्सलाई बलियो बनाउनुपर्ने, मुख्य पर्यटकीय स्थलमा तत्कालै बस टर्मिनल बनाउनुपर्नेमा उनले जोड दिएका छन्। आफू महासचिब हुँदा शुरु गरेको काठामाडौंको बस टर्मिनल बन्ने क्रममा रहेको उल्लेख गर्दै गुरागाईंले त्यसलाई पूर्णता दिनुपर्नेमा जोड दिए।
‘नो टुर वीद आउट टुर गाइड एण्ड टुर अपरेटर’ भन्ने सिद्धान्तलाई व्यबहारमा उतार्नु पर्ने भन्दै उनले व्यवसायीहरुको हितका लागि इमर्जेन्सी फण्ड संचालन गर्न आफू प्रतिबत भएर लाग्ने बताएका छन्।
