राजधानीमा जारी सहिद स्मारक ए डिभिजन लिग फुटबलमा विभागीय टोली त्रिभुवन आर्मी क्लब एफसी खुमलटारसँग बराबरीमा रोकिएको छ।
त्रिपुरेश्वरस्थित दशरथ रंगशालामा शुक्रबार आर्मीले एफसी खुमलटारसँग २–२ गोलको बराबरी खेलेको हो। आर्मीका लागि जगजित श्रेष्ठ र नवयुग श्रेष्ठले एक एक गोल गरे। खुमलटारका मेसुके ओलुमोउ र स्टेफेन समिरले एक एक गोल गरे।
खेलको १४ औं मिनेटमा जगजितले फ्रिकिक मार्फत गोल गर्दै आर्मीलाई सुरुआती अग्रता दिलाएका थिए। तर, खेलको ३५ औं मिनेटमा मेसुकेले गोल गर्दै खुमलटारलाई १–१ गोलको बराबरीमा ल्याए। खेलको ५१ औं मिनेटमा नवयुगले गोल गर्दै आर्मीलाई २–१ को अग्रता दिलाए। त्यसपछि खेलको ७५ औं मिनेटमा स्टेफेन समिरले गोल गर्दै खुमलटारलाई २–२ गोलको बराबरीमा ल्याए। यस बराबरीसँगै आर्मीले १९ खेलमा २६ अंक जोडेको छ। खुमलटारले १९ खेलमा १८ अंक जोडेको छ।
त्यस्तै शुक्रबार नै एन्फा कम्प्लेक्समा हिमालयनले विभागीय टोली एपीएफ क्लबलाई ३–२ गोल अन्तरले पराजित गरेको छ। हिमालयनको जितमा खामिर गिल्सन,पिस्टोन मुटुम्बा र अबायोमी फाकुन्लेले एक एक गोल गरे । एपीएफका सनिश श्रेष्ठ र युवराज खड्काले एक एक गोल फर्काए।
जितसँगै हिमालयनले १९ खेलमा २४ अंक जोडेको छ । एपीएफले १९ खेलमा २२ अंक जोडेको छ।
