कपिलवस्तु जिल्लाको यशोधरा गाँउपालिकाको वडा नं. ८ मा रहेका दुईवटा क्वारेन्टाइनमा बसेका ४५ जना भागेका छन्।
भारत र अन्य ठाँउबाट आएका सबै व्याक्तिलाई क्वारेन्टाइनमा नराखेको भन्दै शुक्रबार र शनिबार राति उनीहरु क्वारेन्टाइन छोडेर भागेका हुन्।
शुक्रबार राति वडा नम्बर ८ को खोरियास्थित सरस्वती प्राविको क्वारेन्टाइनका ३० जना र शनिबार सोही वडाको राष्ट्रिय निमाबि सिंहो खोरका थप १५ जना समेत क्वारेन्टाइन छोडेर भागेका वडा अध्यक्ष सहाबुद्दिन मुसलमानले बताए। यशोधरा गाउँपालिकाका १२ जनामा कोरोना संक्रमण पुष्टि भएको छ। वडा नंं ८ मा मात्रै कोरोना ५ जनामा संक्रमण भएको छ । हालसम्म फेला परेका संक्रमित सबै खोरिया गाउँकै हुन्।
क्वारेन्टाइनमा बसेका व्यक्ति भागेर घर घर गएपछि स्थानीयमा त्रास बढेको छ । पहिल्यै गाउँ नै शिल गर्नुपर्नेमा खोरिया गाउँको क्वारेन्टाइनका व्यक्ति भागेर पुनः घरमा फर्किनु सुरक्षा निकायको चरम लापरवाही भएको स्थानीयहरुको आरोप छ। यशोधरा गाउँपालिकाका अध्यक्ष गृजेशकुमार पाण्डेयले गाँउपालिकाको वडा नं. ८ को क्वारेन्टाइनमा राखिएका केही व्यक्ति क्वारेन्टाइनबाट भागेको खबर शुक्रबार नै प्रमुख जिल्ला अधिकारीलाई जानकारी दिएको बताए।
दुई दिनसम्म पनि गाउँमा सुरक्षाकर्मी नखटिंदा र गाउँ शील नहुँदा संक्रमण बढ्न सक्ने अध्यक्ष पाण्डेयले चिन्ता व्यक्त गरेका छन्। क्वारेन्टाइनबाट भागेकालाई सुरक्षाकर्मी परिचालन गरेर नियन्त्रणमा लिइने प्रमुख जिल्ला अधिकारी दीर्घनारायण पौडेलले बताए।