रुपन्देहीको गैडहवा गाउँपालिकामा १० जना कोरोना संक्रमित भेटिएपछि गैडहवा गाउँपालिका सिल गर्ने निर्णय भएको छ।
बिपद व्यवस्थापन समितिको विहिबार गाउँपालिकाका अध्यक्ष बछु लाल केवटको अध्यक्षतामा बसेको बैठकले जेठ २ गते बिहान ६ बजेदेखि जेठ ५ गते रातीसम्मका लागि गाउँपालिका सिल गर्ने निर्णय गरेको हो।
जिल्ला सुरक्षा समिति र संकट व्यबस्थापन केन्द्रसँगको बैठकले पालिकाभित्र आवतजावतमा पूर्ण रुपमा निषेध गर्नका लागि आवश्यक पर्ने सुरक्षाकर्मीको व्यबस्थापन गर्न अनुरोध गरेको छ भने मेडिकल वाहेक सबै उद्योग व्यबसाय बन्द हुने बताइएको छ। गाउँपालिकाभित्र अनुमती बिना आवतजावत गर्न पाइने छैन।
उक्त गाउँपालिका बडा नम्बर २ मा एकै परिवारका ७ सहित १० जनामा बुधबार कोरोना पुष्टि भएको थियो। अहिले पनि सो गाउँपालिका भित्रका बिभिन्न वडामा भारतबाट लुकिछिपी आएर बसेका ब्यक्तीहरु रहेका आंशका गरिएको छ।
संक्रमित सवै भारतको मुम्बईबाट कपिलबस्तुको चाकरचौडा नाका हुदै नेपाल प्रबेश गरेका थिए। गाउँपालिका जोगडामा रहेको नव दुर्गा माध्यमिक बिद्यालयको क्वारेन्टीनमा रहेका ४० ब्यक्तीहरुको स्वाव परीक्षण गरिएको मध्ये १० जनाको रिर्पोट पोजेटिभ आएको थियो।
