सिद्धकुमाख गाउँपालिका ३, फलाटेका पुने रेउलेले पानी घट्ट बनाउने काम गर्न थालेको ३७ वर्ष भयो । सोह्र वर्षका उमेरदेखि पानी घट्ट बनाउन व्यस्त रेउले आजभोलि फुर्सदिलो बनेका छन् । एउटै खानीबाट ५० लाखभन्दा बढीका पानीघट्ट बिक्री गरेर आठ जनाको परिवारको खर्च टार्दै आएका सोही ठाउँका नरबहादुर रेउले पनि अहिले फुर्सदमा छन् । घर नजीकैको ढुङ्गेखानीबाट पानीघट्ट र जाँतो बनाउन बिहानैदेखि व्यस्त हुने नरबहादुर मुश्किलले महिनामा दुईचार दिन मात्रै खानीमा आउँछन् ।
सल्यान, रोल्पा, रुकुम र जाजरकोटबाट समेत पानीघट्ट लिन आउनेहरु अहिले घटेका छन् । गाउँघरमा विद्युतीय मिलबाटै कुटानी पिसानीको काम हुन थालेपछि पानीघट्ट सङ्कटमा परेसँगै घट्ट निर्माण पेसा पनि सङ्कटमा पर्न थालेको छ । बितेका तीन-चार वर्षदेखि पानीघट्ट किन्ने मानिस निकै कम आउने गरेको पुनेले बताए । “मैले १६ वर्षको उमेरदेखि घट्ट बनाउन सुरु गरें त्यतिबेला एकजोडा घट्टको मूल्य ८ हजार रुपैयाँ थियो, काम पनि त्यत्तिकै आउँथ्यो, हामी २५ जनाले एउटै खानीमा काम गर्दा भ्याइनभ्याइ थियो अहिले ६ महिनामा एकजोडा पनि बिक्री हुँदैन,” पुनेले भने ।
घट्ट बनाएरै आफ्ना छोराछोरीको पढाइ तथा खर्च टार्दै आएका नरबहादुर पनि घट्ट व्यवसाय सङ्कटमा परेपछि चिन्तित छन् । “कुनै बेला काममा भ्याइ नभ्याइ भयो, छोराहरुलाई पनि यही काममा लगाएँ तर अहिले पेसा मात्रै सङ्कटमा परेन, परिवारको आम्दानी पनि बन्द भयो,” नरबहादुरले भने ।
फलाटेमा तीन ठाउँमा पानीघट्टको खानी रहेकाले यसको संरक्षण गर्न गाउँपालिकाले पनि चासो नदिएको खानी मजदुरको गुनासो छ । “यहाँको ढुंगा निकै बलियो भएकोले घट्टको माग पनि बढी नै थियो, न प्रचार-प्रसार भयो न सरकारी निकायले कुनै चासो दियो,” स्थानीय पूर्णबहादुर रेउलेले भने । उनका अनुसार खानीबाट ३ करोड रुपैयाँ बढीका घट्ट बिक्री भइसकेको छ ।
अहिले एक जोडा घट्टको मूल्य २० हजारदेखि ६० हजार रुपैयाँसम्म पर्ने पूर्णबहादुर रेउलेको भनाइ छ । “एक जोडा घट्ट निर्माण गर्न चारदेखि ६ दिनसम्म लाग्छ तर अहिले पेसा सङ्कटमा परेपछि मानिस भारत तथा अन्य देशमा पलायन हुन थालेका छन्,” पूर्णबहादुरले भने ।
पानी घट्ट निर्माण व्यवसाय प्रचार तथा व्यवस्थित गर्न सके गाउँमै स्वरोजगारको गतिलो माध्यम बन्न सक्ने भए पनि गाउँपालिकाले कुनै चासो नदिएको स्थानीयको गुनासो छ । गाउँपालिकाले खानी व्यवस्थित गर्नका लागि माग नआएको गाउँपालिकाका अध्यक्ष चित्रबहादुर चलाउनेले जानकारी दिए । “कुनै बेला मैले पनि घट्ट बनाउने काम गरेको हुँ, समस्या छ तर पनि के गर्ने भन्ने माग नै आएको छैन,” उनले भने ।
उनीहरुले माग गर्न आए गाउँपालिका सहयोग गर्न तयार रहेको चलाउनेको भनाइ छ । “यहाँ पानी घट्ट बनाउने २५ जना छन् उहाँहरुले यसलाई व्यवस्थित गर्न ठोस योजनासहित माग गर्न आउनुभयो भने हामी सहयोग गर्न तयार छौं,” उनले भने । जलवायु परिवर्तनका कारण पानीका मुहान सुकेपछि घट्टसमेत कम हुँदै गएकाले माग घटेको हुन सक्ने अध्यक्षको भनाइ छ । “विभिन्न कारणले पानी घट्टको माग कम भएको हुन सक्छ, यसलाई बुझेर गाउँपालिकाले पनि योजना बनाउँछ,” चलाउनेले भने । -रासस