प्रधानमन्त्री पुष्पकमल दाहालले विश्वासको मत पाएलगत्तै एमालेलाई सबै प्रदेशबाट हटाउने गठबन्धनको तयारी छ । नेपाली कांग्रेस नेतृत्वको नयाँ गठबन्धन बनेपछि एमाले शक्तिविहीन बन्दै गएको छ । प्रधानमन्त्रीले यही चैत ६ गते विश्वासको मत लिने तयारी गरेका छन् ।
एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहालले गत पुस १० गते निकै कसरत गरेर बनाएको गठबन्धन राष्ट्रपति पाउनुपर्ने अडानका कारण भत्किएको थियो ।
भत्किएपछि एमालेले संघीय सरकारमात्र गुमाएको छैन कि राष्ट्रपति र उपराष्ट्रपति पनि आफ्नो हातबाट फुत्काएको छ । अघिल्लो पटक पहिलो दल भए पनि एमाले सत्ताबाहिरै बस्नु परेको थियो । अहिले पनि नेतृत्वले समन्वयकारी भूमिका खेल्न नसकेकै कारण एमालेले त्यही नियति भोग्दै छ ।
दाहाललाई प्रधानमन्त्री बनाएर राष्ट्रपति, सभामुख तथा बहुमत प्रदेश सरकारको नेतृत्व लिने गरि एमाले अध्यक्ष ओलीले समीकरण बनाएका थिए । ओलीको क्रियाकलापले झस्किएका दाहालले पुनः कांग्रेससहितको नयाँ गठबन्धन बनाएका हुन् । अब संघमा बनेको गठबन्धनको प्रभाव प्रदेशमा पर्ने निश्चित छ । एमाले ७ मध्ये ६ वटा प्रदेश सरकारमा छ ।
त्यहीअनुसार राष्ट्रपतिमा कांग्रेस र उपराष्ट्रपतिमा जसपाका उम्मेदवार निर्वाचित भए । सुरुमा ४ प्रदेशको नेतृत्व गरेको एमालेले सुदूरपश्चिम प्रदेश सरकार त गुमाइसकेको छ । एमालेका लागि सबैभन्दा सहज मानिएको कोशी प्रदेशमा पनि गठबन्धन दल मिलेर विस्थापित गर्ने तयारी गरेका छन् ।
बागमती प्रदेश सरकारको नेतृत्व माओवादी केन्द्रले गरेको भए पनि अहिलेसम्म एमाले बाहिरिएको छैन । गण्डकी र लुम्बिनीमा पनि एमालेबाहेककै गठबन्धनको बहुमत पुग्ने अवस्था छ । माओवादीले नेतृत्व गरेका प्रदेशमा एमालेलाई अलग्याउने तयारी गठबन्धन दलको छ ।
