राष्ट्रिय स्वतन्त्र पार्टीले सरकारमा रहने वा नरहने भन्नेबारे आज निर्णय लिने भएको छ । दुई दिनको लागि दिएको अल्टिमेटम हिजो साँझ सकिएको थियो । रास्वपाले गृहमन्त्रालयमा दाबी गरेको छ। तर, प्रधानमन्त्री पुष्पकमल दाहालले कुनैपनि हालतमा गृहमन्त्रालय रवि लामिछानेलाई नदिने अडान लिएका छन् ।
दाहालले लामिछानेलाई मात्रै नभएर उनी नेतृत्वको रास्वपालाई नै गृहमन्त्रालय नदिने अडान दिएका छन् । रास्वपाले भने पुष १० मा नै गृहमन्त्रालय आफूले पाउने सहमति भएकोले त्यसबाट दायाँबायाँ हुन नपाउने भनेको छ । दाहाले भने सत्ता गठबन्धन नै धरापमा पारेर भएपनि गृहमन्त्रालय कुनै हालतमा अरुलाई नदिनेमा पुगेका छन् ।
रास्वपाले आज निर्णायक कदम चाल्ने भनेको छ। त्यसको लागि पार्टीको केन्द्रीय समिति र संसदीय दलको संयुक्त बैठक आह्वान भएको छ। त्यसअघि सभापति लामिछानेले प्रधानमन्त्री दाहालसँग भेटवार्ता गरेका थिए । सो भेटवार्तामा दाहालले गृहको साटो भौतिक पूर्वाधार तथा यातायात मन्त्रालय लिन प्रस्ताव गरेका छन् ।