नेकपा एकीकृत समाजवादी पार्टीका अध्यक्ष माधवकुमार नेपालले एमालेबाट विद्रोह गर्नु जायज भएको बताएका छन् । पार्टीको पाँचौं केन्द्रीय समिति बैठकमा आफ्नो राजनीतिक प्रतिवेदन प्रस्तुत गर्दै अध्यक्ष नेपालले सो कुरा बताएका हुन् ।
अध्यक्ष नेपालले बैठकमा सबै प्रकारको कम्युनिष्ट आन्दोलनलाई अगाडि बढाउन विद्रोह गरिएको बताए । देशका प्रत्येक मोडमा कम्युनिष्ट पार्टीले गौरवशाली भूमिका खेलेको उल्लेख गर्दै उनले कम्युनिष्ट पार्टीले खेलेको भूमिकाप्रति गौरवबोध भएको बताए ।
संविधान निर्माणपछि दुईटा चुनाव सम्पन्न भइसकेको बताउँदै उनले पहिलो चुनावबाट नेकपा झण्डै दुई तिहाई बहुमतमा भएको र ऐतिहासिक अवसर पाए पनि व्यक्तिवाद हावी हुन पुगेको उनले बताए ।
एमसीसीको विषय होस् या विदेशी एजेन्सीसँग भेटेको कुरा होस् वा भ्रष्टाचारको घटना होस् ती सबै कुरामा केपी ओली फँस्दै गएको बताउँदै उनले अोलीमा गुटवाद र संकिर्णता देखिएको टिप्पणी गरे । नयाँ पार्टी निर्माणको प्रसंगमा उनले अहिले १७ महिनाको यात्रा तय गरेको बताउँदै यो यात्रा लामो नभएको अध्यक्ष नेपालले बताए । तर यो छोटो समयमा निकै महत्वपूर्ण काम गरेको दावी पनि उनले गरे । निर्वाचनको परिणाम सोचे जस्तो नभएको बताउँदै उनले तीन प्रतिशत कटाउन नसकेको सन्दर्भको बारेमा राजनीतिक प्रतिवेदनमा पनि उल्लेख भएको बताए ।
अहिले सरकार बनाएका दलहरुसँग नैतिकता नरहेको बताउँदै उनले सरकारमा देखिएको गलत प्रवृतिको भण्डाफोर गर्नुपर्ने धारणा राखे । उनले सरकारमै रहेर संघीयताको विरोध गर्नुको अर्थ संकटको संकेत भएको बताए ।