नेपाली कांग्रेसका पूर्ब उपसभापति विमलेन्द्र निधिले पाँच बर्षभित्र परासीको मुहार फेर्न कांग्रेस उम्मेदवार बिनोद चौधरीलाई मंसिर ४ को चुनाबमा जिताउन आह्वान गरेका छन्।
बुधबार प्रतापपुरमा आयोजित कांग्रेसको प्रदेशस्तरीय आमसभालाई सम्बोधन गर्दै निधिले यो क्षेत्रबाट जितेका प्रतिनिधिले २५ बर्षमा विकासका नाममा केही पनि नगरेकोले चौधरीले जितेपछि नमूना जिल्ला हुने बिश्वास व्यक्त गरे।
नवलपुरमा चौधरीकै अग्रसरतामा संचालित साश्वतधाममा लाखौं पर्यटक आएको सन्दर्भ उल्लेख गर्दै उनले परासीलाई चौधरीले नेपाल र भारतको मात्र नभई अन्तर्राष्टियस्तरको पर्यटन केन्द्र बनाएर रोजगारीको अवसर सिर्जना गराउने बताए। चुनावपछि कांग्रेसको नेतृत्वमा बन्ने सरकारले नागरिकता विधेयक पास गरेर नागरिकताको समस्या हल गर्ने पनि निधिले बिश्वास दिलाए।
कार्यक्रममा कांग्रेस उम्मेदवार चौधरीले २५ बर्षमा ८ पटक मन्त्री भएर पनि यहाँको जनप्रतिनिधिले जनताका पक्षमा केही काम नगरेको भन्दै अबिश्वासको बादल हटाएर आफूले पाँच बर्षभित्र परासीको तस्वीर बदल्ने प्रतिबद्धता जनाए।
व्यबस्थित आवास निर्माण गरी घर नभएकालाई घर र भूमिहीनहरुलाई भूमिपति बनाउने योजना पनि उनले सुनाए। चुनाबपछि कांग्रेसको नेतृत्वमा सरकार बन्ने दाबी गर्दै उनले नयाँ सरकार गठन हुनासाथ नागरिकता समस्या हल हुने बिश्वास दिलाए।
परासीबाट कांग्रेसका अर्का उम्मेदवार देबेन्द्रराज कँडेलले नागरिकता बिधेयक पारित गरेर छाड्ने प्रतिबद्धता जनाए। उनले त्यसका लागि कांग्रेसका उम्मेदवारहरुलाई मतदान गर्न आह्वान गरे। प्रदेश सभाका उम्मेदवार देवकरण कलवार, समानुपातिक उम्मेदवार लालबहादुर गुरुंग, प्रतापपुर गाउँपालिका अध्यक्ष एवं कांग्रेस जिल्ला सचिव उमेशचन्द्र यादवलगायतले कांग्रेसको चुनाब चिन्ह रुखमा मतदान गर्न आह्वान गरेका थिए।
कार्यक्रममा बिभिन्न पार्टी छाडेर कांग्रेसका प्रबेश गरेका सय जनाभन्दा बढीलाई कांग्रेसका पूर्ब उपसभापति निधिले माला लगाएर स्वागत गरेका थिए।
