प्रतिनिधिसभाकाे प्रत्यक्ष तर्फकाे सिट बाँडफाँटकाे क्रममा सत्ता गठबन्धनमा प्रवेश पाएकाे नयाँ प्रस्तावले तरङ उत्पन्न गराएकाे छ । प्रमुख सत्तारूढ दल नेपाली कांग्रेसले स्थानीय तहकै मोडलमा सहमति गर्ने मनसायसहित नयाँ प्रस्ताव गरेपछि गठबन्धनका नेताहरूबीच आंशका सुरु भएको छ ।
सहमति भएका निर्वाचन क्षेत्रबाहेक बाँकी क्षेत्रमा मित्रवत् प्रतिस्पर्धा गर्ने कांग्रेसकाे प्रस्तावले विशेष गरी माओवादी केन्द्र र एकीकृत समाजवादी झस्किएका छन् । प्रचण्ड र माधव नेपालले भने असहमति जनाएका छन् । मित्रवत प्रतिस्पर्धा गर्ने कांग्रेसको प्रस्तावमा सत्ता गठबन्धनका अर्का दुइ दल जसपा र जनमोर्चाको भने माैन समर्थन देखिएकाे स्राेतले बताएकाे छ ।
माओवादी केन्द्र र एकीकृत समाजवादीका नेताहरूले १ सय ६५ वटै निर्वाचन क्षेत्रमा सहमति जुटाउने तर्फ लाग्नुपर्छ बीचमा अाएर त्यस्ताे प्रस्ताव गर्नु उचित नहुने तर्क गरेका थिए ।
स्राेतका अनुसार कांग्रेसको आन्तरिक समीकरण मिलाउनका लागि नयाँ प्रस्ताव आएको बताइएको छ । शेखर कोइराला समूहले गठबन्धन गरे पनि नगरे पनि पार्टीभित्र आफूहरूलाई ४० प्रतिशतको हिस्सा चाहिन्छ भनिरहेकाा छन् । आन्तरिक समूहको व्यवस्थापनका लागि पनि कांग्रेसले गठबन्धनभित्र मित्रवत् प्रतिस्पर्धाको प्रस्ताव गरेको बुझिएकाे छ।
अहिलेसम्म सत्ता गठबन्धनमा १ सय १५ देखि २० सिटमा मात्र भागवण्डा मिलेको बताइएको छ । कांग्रेसले ९० सिट दाबी गरिरहेको छ भने माओवादी केन्द्रले ५०, एकीकृत समाजवादी र जनता समाजवादीले पनि २५ भन्दा बढी सिटमा दाबी गरेका छन्। दलहरू अडानबाट पछि नहटे सहजै सहमति जुट्ने अवस्था देखिदैन । निर्वाचनमा तालमेल गर्ने सहमति भएकाे डेढ महिना वितिसक्दा पनि सिट बाँडफाँटकाे टुंगाे लाग्न सकेकाे छैन ।