नेपाली कांग्रेसका पूर्व उपसभापति विमलेन्द्र निधिले स्थानीय निर्वाचनमा सत्तासीन दलहरुबीच जहाँ जे जसरी तालमेल भएको छ, त्यसै अनुसार मत दिन आग्रह गरेका छन्।
लोकतान्त्रिक बाम गठबन्धनद्धारा धरान उपमहानगरपालिकामा शनिबार आयोजित प्रतिबद्धता पत्र सार्वजनिक कार्यक्रमलाई सम्बोधन गर्दै पूर्व उपसभापति निधिले गठबन्धनका उम्मेदवारहरुलाई मत दिएर जिताउन आग्रह गरे।
गठबन्धनका उम्मेदवारहरुले जितेपछि पूर्वी नेपालको पहाड मधेश जोड्ने धरानलाई व्यापारिक शहर बनाउनका लागि पहल गनुपर्ने भन्दै उनले धरानवासीले प्रमुख रुपमा भोग्नु परेको खानेपानीको समस्या समाधानका लागि लोकतान्त्रिक बाम गठबन्धनका उम्मेदवारहरुलाई जिताउनु पर्नेमा जोड दिए।
धरान उपमहानगरपालिकाको मेयरका लागि भएको उपचुनाबमा कांग्रेसले जितेको भए पनि बहुमत नहुँदा खानेपानी लगायतका समस्या समाधान हुन नसकेको निधिको भनाई थियो। त्यसैले वैशाख ३० को चुनाबमा गठबन्धनका उम्मेदवारलाई मत दिएर धरानमा विकासको ढोका खोल्न उनले मतदाताहरुलाई आह्वान गरे।
एमालेले गत निर्वाचनमा बहुमत ल्याएर सरकार गठन गरेको भए पनि आन्तरिक बिबादका कारण पूरै अबधि सरकार संचालन गर्न नसकेको भन्दै निधिले तीन बर्षको अबधिमा एमालेले कार्यपालिका, व्यबस्थापिका, न्यायपालिका, सुरक्षा निकाय सबै क्षेत्रलाई तहसनहस बनाएको आरोप लगाए।
कार्यक्रममा मेयर पदका उम्मेदवार किशोर राईले संविधान र परिवर्तनका एजेण्डालाई जगेर्ना गर्नका लागि गठबन्धनका उम्मेदवारलाई जिताउनु पर्ने बताए। आफूले जितेमा पाँच बर्षको बीचमा धरानको आमूल परिबर्तन गर्ने उनले घोषणा गरे।
स्थानीय व्यबसायीहरुसँग सहकार्य गरेर अघि बढ्ने भन्दै राईले २० वटै वडामा बजारीकरण गरी धरानलाई आर्थिक रुपमा समृद्ध शहर बनाउने योजना सुनाए। उमेयरका उम्मेदवार अइन्द्र बिक्रम बेघाले धरानलाई औद्योगिक र व्यापारिक नगरका रुपमा बिस्तार गरिने उल्लेख गरे।
नेपाली कांग्रेसका क्षेत्रीय सभापति सुरेन्द्र तामाको सभापतित्वमा भएको कार्यक्रममा मारवाडी समुदायका तर्फबाट सन्तोष अग्रवाल, मधेशीका तर्फबाट शिबनारायण साह, माओवादीका अशोक राई लगायतकाले गठबन्धनका उम्मेदवारहरुलाई जिताएर धरानबासीको सपना पूरा गर्नुपर्नेमा जोड दिएका थिए।
कार्यक्रममा नेपाली कांग्रेसका केन्द्रीय सदस्य मीन बिश्वकर्मालगायत जिल्लास्तरका नेता तथा कार्यकर्ताहरुको उपस्थिति रहेको थियो।
यसैबीच, निधिले इटहरी उपमहानगरपालिकामा कांग्रेसका नेता तथा कार्यकर्ताहरुसँग स्थानीय निर्वाचनमा कांग्रेसको अबस्था बारे छलफल गरेका थिए। छलफलमा कांग्रेस केन्द्रीय सदस्य राजीव कोइराला, मेयरका उम्मेदवार हेमकर्ण पौडेलसहित भीम पौडेल, रोहित प्रसाई, गीता श्रेष्ठ, बीरेन्द्र कार्की,रेखा प्रसाईलगायतले इटहरीमा कांग्रेसको अबस्थाबारे जानकारी गराएका थिए।
निधिले टिकट बितरणमा केही कमिकमजोरी भएको भए त्यसका लागि कांग्रेसका तर्फबाट आफूले पनि जिम्मा लिने भन्दै निर्वाचनपछि समीक्षा गर्न आग्रह गरे। उनले गठबन्धनका उम्मेदवारहरुलाई बिजयी गराउनु आजको प्रमुख दायित्व भएको बताए।
