केपी ओली नेतृत्वकाे सरकार र नेत्रविक्रम चन्द(विप्लव) समूहबीच अब वार्ता हुने भएकाे छ । वार्ताका लागि दुबै पक्षबाट मंगलबार दुई/ दुई सदस्यीय वार्ता टाेलीकाे नाम सार्वजनिक गरेका हुन् ।
सरकारले गृहमन्त्री रामबहादुर थापाकाे नेतृत्वमा वार्ता समिति गठन गरेकाे केही घण्टामा नेकपाका महासचिव नेत्रविक्रम चन्दले मंगलबार दिउँसो विज्ञप्ति जारी गरी सरकारसँग वार्ता गर्ने टोली गठन गरिएको जानकारी गराएकाे हाे ।सरकारसँग वार्ताका लागि चन्द समूहले प्रवक्ता खड्गबहादुर विश्वकर्मा 'प्रकाण्ड' र उदय चलाउने 'दीपक'को नेतृत्वमा दुई सदस्यीय टोली गठन गरेको छ ।
यस्तै, सरकारी वार्ता टोलीमा गृहमन्त्री थापा र प्रधानमन्त्री केपी शर्मा ओलीका परराष्ट्र मामिला सल्लाहकार राजन भट्टराई सदस्य छन् ।चन्द समूहले वार्ताका लागि पार्टीमाथि लगाएको प्रतिबन्ध फुकुवा हुनुपर्ने, जेलमा रहेका नेताकार्यकर्ता रिहा, हतियारसम्बन्धी मुद्दा फिर्ता गर्नुपर्ने सर्त राखेका छन् ।
मंगलबार सरकारका प्रवक्तासमेत रहेका सञ्चारमन्त्री पार्वत गुरुङले चन्द समूहसँगकाे वार्ताकाे मिति छिट्टै तय हुने बताए । उनले हतियार मुद्दालगायतका विषय वार्ताबाटै टुंगो लगाइने पनि जानकारी दिए ।
