नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्डले सार्वभौम जनाताको विरुद्ध तरबार उठाएर केपी ओलीले बाजी हारेको बताएका छन्।
मंगलबार प्रेस संगठन नेपालको भेलामा प्रचण्डले संविधानमा हुँदै नभएको व्यवस्थामा टेकेर संसद बिघटन गर्नु जनादेश बिपरित भएको भन्दै सार्वभौम जनाताको विरुद्ध तरबार उठाएर ओलीले बाजी हारेको तर्क गरेका हुन्।
अध्यक्ष प्रचण्डले माधव नेपालका पक्षमा रहेका कार्यकर्तालाई हेपेर प्रधानमन्त्री केपी शर्मा ओलीले ‘ब्लन्डर’ गरेको बताए। ओली इतिहासका कलंक भएको भन्दै प्रचण्डले आफ्नै कर्मका कारण ओली ‘कू’ पात्र बनेको जिकिर गरे। संसद भंग गरेर ओलीले देशलाई संविधानविहीनता र तानाशाहीको भूमरीमा लैजान खोजेको प्रचण्डले आरोप लगाए।
प्रचण्डले प्रतिनिधिसभा विघटन राजतन्त्र पुनःस्थापना गर्ने प्रक्रियाको सुरुवात भएको पनि बताए। उनले आफैंले प्रस्ताव गरेको प्रधानमन्त्री केपी शर्मा ओलीले जनतामा निहित सार्वभौमसत्तामाथि आक्रमण गरेकाले आफूमा आवेग, घृणा र आक्रोश रहेपनि अधैर्य नभएको जिकिर गरे। उनले विधि, पद्धतिबाट प्रतिगमन सच्याउन चाहेको उल्लेख गरे।
त्यस्तै नेकपा प्रचण्ड–नेपालपक्षका अध्यक्ष माधवकुमार नेपालले सत्य र न्यायको पक्षमा आफूहरु रहेको बताए। संघीयता नै संकटमा पुगेको अवस्थामा सही र गलत छुट्याउनुपर्नेमा उनले जोड दिए। नेपालले असली एमाले आफू भएको दाबी गर्दै एमाले र माओवादी कोही नरहेको समेत प्रष्ट पारे।
अध्यक्ष नेपालले अहिलेको आन्दोलनले सुन्दर समाजको परिकल्पना गरेको भन्दै यसमा पत्रकारको सकारात्मक भूमिका आवश्यक भएको उल्लेख गरे। पूर्वप्रधानमन्त्रीसमेत रहेका नेपालले ओली गणतन्त्र र संघीयता विरोधी भएको आरोप लगाए।
