नेपाली कांग्रेसका उपसभापति विमलेन्द्र निधिले संघीय लोकतान्त्रिक गणतन्त्रतात्मक प्रणाली बिफल बनाउने गरी बर्तमान सरकारले एकदलीय तानाशाही व्यबस्था लाद्न खोजेको आरोप लगाएका छन्।
नेपाली कांगेस केन्द्रीय नीति, अनुसन्धान तथा प्रशिक्षण प्रतिष्ठानले हेटौँडामा गरेको दुईदिने प्रशिक्षण कार्यक्रमको बुधबार आयोजित समापन कार्यक्रममा कांग्रेस उपसभापति निधिले संवैधानिक प्रणालीलाई कमजोर पार्ने, राज्यका अंगहरुमाथि नियन्त्रण गर्न खोज्ने, सी विचारधाराबारे प्रशिक्षण चलाउने लगायतका गतिविधिले देशलाई अधिनायकवादतर्फ उन्मुख गराउन खोजेको प्रष्ट हुने बताए।
यस्ता अधिनायकवादी चरित्रबारे जनतालाई बेलैमा सुसुचित गर्न कांग्रेसले देशब्यापी प्रशिक्षण कार्यक्रम संचालन गरेको उनको भनाई थियो। प्रशिक्षण प्रतिष्ठानका प्रमुख समेत रहेका उपसभापति निधिले तल्लो तहसम्म प्रशिक्षण संचालन गर्दै सरकारका गलत कार्यबारे कांग्रेसका सदस्य र जनतालाई सुसुचित गर्न आग्रह समेत गरे।
सरकारको गतिबिधिका कारण परिबर्तनका एजेण्डामाथि नै खतरा आएको निधिले बताए। उनले संवैधानिक व्यवस्था अनुसार तल्लो तहका सरकारलाई अधिकार दिनु पर्नेमा तिनका अधिकार खोसेर प्रधानमन्त्री कार्यालयमा केन्द्रिकृत गराएको उल्लेख गरे।
नेपाली कांग्रेस मकवानपुरका उपसभापति विष्णुप्रसाद लामिछानेको अध्यक्षतामा भएको कार्यक्रममा कांग्रेस मकवानपुरका सचिव बुद्ध लामा, प्रतिष्ठानका कार्यकारी निर्देशक पुरुषोतम दाहाल लगायतले मन्तव्य व्यक्त गरेका थिए।
कार्यक्रममा केन्द्रीय सदस्य महालक्ष्मी उपाध्याय डिना, ३ नम्बर प्रदेश संसदीय दलका नेता इन्द्रबहादुर बानियाँ, प्रतिनिधिसभा सदस्य एवं नेपाल महिला संघकी सभापति उमा रेग्मी, नेपाली कांग्रेसकी प्रदेश संसदीय दलकी प्रमुख सचेतक राधा घले, प्रदेशसभा सदस्यहरु नरोत्तम बैद्य, सन्तबहादुर चेपाङ, विजुला बर्मा, प्रभात तामाङ लगायतको सहभागिता रहेको थियो।
मंगलबारेखि शुरु भएर बुधबार सम्पन्न दुईदिने प्रशिक्षणमा रसुवा, नुवाकोट, धादिङ, चितवन, मकवानपुर र सिन्धुलीका महाधिवेशन प्रतिनिधिहरुको सहभागिता रहेको थियो।
