नेपाली कांग्रेसका वरिष्ठ नेता रामचन्द्र पौडेलले सरकारलाई सीमासम्बन्धी सबै समस्या समाधान गर्न सबैभन्दा उत्तम समय भएको बताएका छन् ।
बाराको निजगढमा आयोजित कार्यकर्ता भेटघाट कार्यक्रममा उनले सीमा समस्या विगतदेखि कै भए पनि वर्तमानमा जस्तो स्थिर सरकार र सबै राजनीति शक्तिको साथ कहिल्यै नपाएको बताए । सीमा समस्या धेरै पहिलेदेखि हो तर यो पटक चुक्न नहुने उनको तर्क छ ।
'हामीले प्रधानमन्त्रीलाई भनेका छौँ, तपाईंले कूटनीतिक पहल गरेर समाधान गर्नु जरुरी छ । दक्षिणतिर मात्र होइन नेपालको उत्तरी भागमा पनि सीमा विवाद छन् । आफ्नो देशको सीमा सुरक्षाका लागि हामी एक छौं,' उनले भने, 'प्रधानमन्त्रीको गफ मात्रै हो कि काम पनि हो । हामीले हेर्ने बेला आएको छ ।’
नेता पौडेलले कांग्रेसलाई अब नयाँ शिराबाट अघि बढाउन जरुरी रहेको बताउँदै त्यसका लागि चाँडै महाधिवेशन कार्यतालिका तय बनाएर अगाडि बढ्नुको विकल्प नभएको स्पष्ट पारे ।