नेपाल कम्युनिस्ट पार्टी (नेकपा) प्रदेश २ को राजनीति यतिबेला तरंगित छ। २४ भदौमा महोत्तरीको बर्दिबासमा आयोजित जिल्ला कमिटीको शपथग्रहणमा भएको सांघातिक आक्रमणका कारण राजनीति तरंगित भएको हो।
नेकपा प्रदेश २ का कतिपय नेताहरूको भनाइमा वरिष्ठ नेता माधवकुमार नेपाल र स्थायी कमिटी सदस्य मातृका यादवको निर्देशनमा घटना भएको हो। उनीहरूका अनुसार त्यसैकारण नेकपा प्रदेश २ ले केन्द्रीय सचिवालयसँग नेताद्वयमाथि कारबाहीको माग गरेको छ।
बर्दिबास घटना हुनुको पछाडि मातृकाको विगतको भोगाइ मुख्य कारण रहेको बुझ्न सकिन्छ। व्यक्तिगत टकराव, राजनीतिक संरक्षणको खोजी र एकलौटी नेतृत्व गर्ने चाहना नेता यादवको राजनीतिक स्वभाव छ भने प्रतिकूल राजनीतिक परिस्थिति आक्रामक हुनुको कारण।
मुलुक संघीय संरचनामा गएसँगै पार्टीले यादवलाई प्रदेश २ को इन्चार्जको जिम्मेवारी दिएको थियो। तर प्रदेश इन्चार्जका रूपमा उनको भूमिका शून्यप्रायः रह्यो। जिल्लासहित तल्लो कमिटी गठन तथा संगठन सुदृढीकरणको जिम्मेवारी पाएका यादवले कुनै काम गर्न नसक्दा अध्यक्ष पुष्पकमल दाहाल रुष्ट बनेका थिए। दाहालले इन्चार्जबाट हटाउने तयारी गरिरहेकै बेला जिम्मेवारीबाट पछि हट्ने प्रस्ताव अध्यक्ष दाहालसामु यादव आफैंले गरे। स्थानीय तह चुनावको पूर्वसन्ध्यामा मातृकाको पक्षमा नतिजा आउन नसक्ने विश्लेषण गर्दै दाहालले प्रदेश २ को हकमा विशेष निर्णय गरे, मातृकालाई धनुषा जिल्लाको इन्चार्जमा समिति बनाइदिएर।
सर्लाही र महोत्तरी इन्चार्जमा गिरिराजमणि पोखरेल, सिरहा र सप्तरी इन्चार्जमा विश्वनाथ साह, रौतहट र बारा इन्चार्जमा प्रभु साह तथा पर्सा इन्चार्जमा उर्मिला अर्याललाई तोके। त्यसबेलादेखि अपमानित महसुस गरेका मातृका त्यसयता निरन्तर ओरालो लाग्दै आएका छन्।
एमाले र माओवादीको एकतापछि पुनः दाहाललाई साथ दिने विश्वास दिलाएर स्थायी कमिटी सदस्य बन्न सफल भए मातृका। तर केन्द्रीय सदस्य चयनका बखत आफूखुसी केही नेतालाई केन्द्रीय कमिटीमा राख्न लगाए भने पार्टीका सक्रिय एवं साबिकका केन्द्रीय सदस्यसँग कुरा नमिल्ने भएकै कारण कमिटीमा पर्न दिएनन्।
बाराका अनिल श्रेष्ठलाई पाखा लगाउँदै गोपाल ठाकुरलाई केन्द्रीय सदस्य बनाए। त्यस्तै, सिरहाबाट केन्द्रीय सदस्य रहेका दिलीप साहलाई व्यक्तिगत रिसइबीका कारण केन्द्रीय कमिटीमा पर्न दिएनन् भने जगत यादवलाई अगाडि बढ्न दिएनन्। धनुषाका रामचन्द्र मण्डललाई जिल्ला पदाधिकारी चयन गराए।
गुट बलियो बनाएर केन्द्रलाई घच्घचाउन तल्लो तहमा पनि आफ्नोे प्रभाव पार्न आफूखुसी जिल्ला कमिटीमा सदस्य थपे। प्रभु साहसँगको सम्बन्धका कारण हरेक जिल्लामा आफूखुुसी सदस्य पनि बनाए।
केन्द्रदेखि जिल्ला तहसम्म निकटका कार्यकर्तालाई कमिटीमा राखेका मातृकाले एकलौटी रूपमा कमिटी गठन गरिएको भन्दै बर्दिबासमा प्रभु साहमाथि आक्रमण गराए। यसो गर्नु पछाडि आफ्नो कुरा सुन्न छाडेका दाहाललाई तर्साउनु नै भएको बताइन्छ। पार्टीमा भूमिकाविहीन बनेका मातृका अस्तित्वको खोजीमा छन् भने यही मौकामा माधव नेपालसँग साँठगाँठ पनि गरेका छन्।
मातृकाको अर्को भय हो, मन्त्री पदबाट बर्खास्ती। सरकारको कार्यसम्पादन कमजोर हुनुको एउटा प्रमुख कारण उद्योग, वाणिज्य तथा आपूर्तिमन्त्री मातृका भएको प्रधानमन्त्री केपी ओलीको बुुझाइ छ। तर पनि अर्का अध्यक्ष दाहालको संरक्षणमा उनको मन्त्री पद जोगिएको थियो। तर पछिल्लो समय बचाउ गर्ने कोही नहुँदा उनी अत्तालिएका छन्। खासमा मन्त्री यादवलाई हटाएर साहलाई मन्त्री बनाउने तयारी पार्टी नेतृत्वले गरेपछि उनी साहको नेतृत्वमा हुने हरेक काममा बाधक बन्दै आएको निकट स्रोतको भनाइ छ।