गृहमन्त्री रामबहादुर थापाले कञ्चनपुरकी निर्मला पन्त प्रकरणमा राजनीतिकरण भएको भन्दै दु:ख मनाउ गरेका छन् ।
गृह मन्त्रालयमै मंगलबार आयोजित पत्रकार सम्मेलनमा उनले निर्मला पन्तको बलात्कारपछि हत्या घटना जघन्य अपराध भएको बताए । तर, गृह जोडिएको छ, अपराधीहरुलाई बचाउन खोज्यो भन्नु दुःखद भएको उनले बताए ।
‘यो घटनामा गृह नै जोडिएको छ, अपराधीलाई बचाउन खोजिएको छ भनेर राजनीतीकरण गर्नु दुःखद हो,’ थापाले प्रतिप्रश्न गरे, ‘के साच्चै गृहले छुटाउन खोजेकै हो त ?’
उनले यस्ता घटनालाई पूर्ण रुपमा रोक्न नसकिने समेत बताए । ‘यस किसिमका अपराध नयाँ र पहिलो होइन । निर्मला प्रकरणहरु यसभन्दा अगाडि पनि थिए, आज पनि छ र भोलि पनि केही समयसम्म रहन्छ । यस किसिमको अपराधलाई पूर्ण रुपमा निषेध गर्न हामी सक्दैनौं,’ गृहमन्त्री थापाले भने ।
उनले यस्ता घटनामा ९५ प्रतिशत र समग्र अपराधमा संलग्नलाई पक्राउ गरी कारबाही गर्न नेपाल प्रहरी ९७ प्रतिशत सफल भएको तथ्यांक प्रस्तुत गरे । केही घटनामा सफलता हात पार्न नसकिएको र विगतका सरकारका पालामा भएका घटनामा पनि यस्तो हुने गरेको भन्दै उनले भने, ‘यस्तो अरु देशमा पनि हुन्छ । अमेरिकामा पनि हुन्छ ।’
यद्यपि निर्मला प्रकरण र यस्ता अपराधिक घटनामा संलग्नलाई कानुनी कठघरामा ल्याउन सरकार प्रतिबद्ध रहेको उनले दाबी गरे ।
'विप्लव समूहबाट गणतन्त्र र संघीयतामा चुनौती'
यस्तै उनले गणतन्त्र र संघीयताको रक्षामा नेत्रविक्रम चन्द विप्लव समूहबाट चुनौती थपिएको बताएका छन् । उनले देशमा शान्ति सुरक्षा अझ सुदृढ बनाउनुपर्ने महसुस गरिएको पनि बताए ।
‘संघीयता, संघीय लोकतान्त्रिक गणतन्त्रको रक्षा गर्ने, त्यसलाई सदृढ गर्ने, त्यो हाम्रो राजनीतिक उपलब्धिसँग जोडिएको छ । यसमा अहिले चुनौती निश्चित रुपमा विप्लव समूहबाट भएको छ । राजनीतिक उपलब्धीको रक्षा गर्ने चुनौती र जिम्मेवारी हाम्रो अगाडि छ,’ उनले भने ।
देशमा पूर्ण शान्ति छैन : गृहसचिव राई
यस्तै पत्रकार सम्मेलनमा गृहसचिव प्रेमकुमार राईले सुरुमै भएको त्रुटिका कारण निर्मला हत्या प्रकरणको अनुसन्धान निष्कर्षमा पुग्न नसकेको बताए । उनले यो प्रकरणमा सरकारले निरन्तर छानबिन गरिरहेको दाबीसमेत गरे ।
उनले मुलुकमा पूर्ण शान्ति नभए पनि सुधारोन्मुख रहेको दाबी गरे । ‘हामीले विगतभन्दा बेटर मात्र भनेका छौं । पूर्ण शान्ति बनाउन भूमिका खेल्नुपर्छ । विप्लव समूहहरु जब मूलधारमा आउनुहुन्छ, त्यसपछि मात्र शान्ति सुरक्षाले पूर्णता पाउँछ । हामी त्यसतर्फ लागिरहेका छौं,’ उनले भने ।
