कीर्तिपुर नगरपालिकाको मेयरमा नेपाली कांग्रेसका तर्फबाट तपाईले जित्नु भयो। कस्तो लागिरहेको छ?
कीर्तिपुरको मेयरमा निर्वाचित हुँदा स्वभाविक रुपमा खुसी लागेको छ। कीर्तिपुरबाट प्रजातन्त्रको पक्षमा जुन ढंगबाट मतदान भएको छ त्यो अभिमतलाई जोगाइराख्ने अभिभारा मेरो काँधमा आएको छ। त्यसकारण जिम्मेवारी थपिएको महशुस गरेको छु।
हिजो बाहिर बसेर हेर्दा कीर्तिपुरका प्रमुख समस्या के देख्नु भएको थियो? तिनको कसरी हल गरेर अघि बढ्ने सोच बनाउनु भएको छ?
कीर्तिपुरमा एउटा भौतिक पूर्बाधारको समस्या छ। अर्को नगरपालिकाभित्र सुशासनको समस्या छ। भौतिक पूर्बाधार क्षमता अनुसार प्राथमिकतामा राखेर एकपछि अर्को अघि बढाउँदै जानेछौं। सुशासन, पारदर्शी, उत्तरदायित्वको कुरा नगरपालिकाका कर्मचारीहरुलाई बिश्वासमा लिएर पूरा गर्छौं। कीर्तिपुरका जनताको घरदैलोमा भरपर्दो सेवासुबिधा पुर्याउने प्रतिबद्धता व्यक्त गर्दछु।
अघिल्लो निर्वाचनमा मेयरको प्रतिस्पर्धामा हुनुहुन्थ्यो। निवर्तमान मेयरको नेतृत्वमा हुन नसकेका कामहरु के के हुन्?
जनतालाई सेवा सुबिधा दिने सबालमा यहाँको मेयरले कुनै पनि काम गर्नु भएन। उहाँले पूर्बाधारको क्षेत्रमा केही काम त गर्नु भएको छ। तर त्यो अत्यन्त अपारदर्शी ढंगबाट भएको छ। एउटै व्यक्तिलाई उपभोक्ता समितिको नाममा ठेक्का दिइएको छ। त्यो बाहेक जुन सेवा सुबिधाको मैले कुरा गरें, त्यसमा उहाँले काम गर्न सक्नु भएन।
भनेपछि तपाईको प्राथमिकता जनतालाई सेवासुबिधा दिनेमै केन्द्रित हुनेछ।
निश्चय पनि लोकतन्त्रपछि संविधानले के भन्यो भन्दा अब सिंहदरबारको अधिकार जनताको घरदैलोमा आइसक्यो भन्ने अनि सेवा लिन एक दिनको काम ३० दिन लगाइदिने परिस्थिति बन्दा लोकतन्त्रप्रति बितृष्णा हुने भयो। गणतन्त्रप्रति बितृष्णा हुने भयो। त्यसकारण जनताले पाउनु पर्ने न्यूनतम सुबिधा उनीहरुकै घरदैलोमा पुर्याएपछि मात्रै सिंहदरबार उनीहरुको घरदैलोमा पुगेको हुन्छ।
कीर्तिपुरको पहिचान भनेको मुल रुपमा यो ऐतिहासिक शहर हो। यसका साथै पर्यटकीय, धार्मिक, साँस्कृति यहाँका थप बिशेषता हुन्। यसको संरक्षणका लागि तपाईको योजना के छ?
कीर्तिपुरमा ऐतिहासिक, धार्मिक, साँस्कृतिक जनु सम्पदाहरु छन् त्यसलाई संरक्षण, सम्बद्र्धन र प्रबद्र्धन गरेर बिश्वसामु चिनाउँछौं। त्यतिमात्र होइन, कीर्तिपुरको आफ्नो छुट्टै ऐतिहासिक यात्रा छ। गौरबशाली गाथा छ। बिशेषतः पृथ्वीनारायण शाहले एकीकरण गर्ने क्रममा कीर्तिपुरले कठिन अबस्था झेल्नु परेको थियो। दुईदुई पटक हार खानु पर्यो। त्यो कीर्तिपुरको गौरबशाली इतिहास हो। हाम्रो नाक काटियो तर त्यो बीरतापूर्बक गोरखालीहरुसँग लडेका कारण हो। गोरखालीहरुलाई हराएका कारण हाम्रो नाक काटिएको हो। त्यो गौरबशाली इतिहास हामी बिश्वसामु चिनाउन चाहन्छौं। कीर्तिपुर नाक कटुवाहरुको शहर कस्तो छ ल हेर्नस् भनेर हामी बिश्वलाई भन्न चाहन्छौं। संसारभरका पर्यटकलाई कीर्तिपुरमा आकर्षितक गर्नका लागि यो बिषय आफैंमा पर्याप्त हुन्छ।
मतदाताहरुलाई के भन्नुहुन्छ?
सबैभन्दा पहिला त नेपाली कांग्रेसलाई जुन बिश्वास गरेर कीर्तिपुरका १० वटा वडामध्ये ९ वटामा जिताउनु भयो त्यसका लागि संपूर्ण मतदाताहरुमा हार्दिक आभार व्यक्त गर्न चाहन्छु। उहाँहरुलाई म बिश्वस्त गराउन चाहन्छु कि तपाईहरुको अभिमत, बिश्वासमा कुठाराघात गर्ने काम गर्ने छैनौं। हामी कीर्तिपुर र कीर्तिपुरवासीको समृद्धि र उन्नतीका लागि काम गर्छौं। कीर्तिपुरबासीले अनुभूति गर्ने गरी काम गरेर देखाउँछौं।