मानव अधिकारवादी संस्था एमनेष्टी इन्टरनेशनलले गुगल र फेसबुकको बिजनेस मोडल मानवअधिकारका लागि खतरा भएको बताएको छ।
एमनेष्टीले एक रिपोर्ट जारी गर्दै यी दुई टेक जायन्ट कम्पनीले गर्ने व्यापक निगरानीका विषयमा चिन्ता व्यक्त गरेको हो। फेसबुक र गुगलले मानवअधिकार हननको स्थिति पैदा गरिरहेको एमनेष्टीको भनाइ छ। तर यसप्रति फेसबुकले भने असहमति जनाएको छ। गुगलले भने आफूले मानिसको भरोसाको कदर गर्ने उल्लेख गर्दै प्रयोगकर्ताको विवरणको सुरक्षाको जिम्मेवारी महसुस गरेको बताएको छ।
रिपोर्टअनुसार गुगल विश्वका ९० प्रतिशत इन्टरनेट प्रयोगकर्ताले प्रयोग गर्छन् भने फेसबुक दैनिक एक तिहाईले प्रयोग गर्छन्। एमनेष्टीका महासचिव कुम नायडुका अनुसार अर्बौं मानिसलाई फेसबुक र गुगलको निर्धारित शर्त मान्नुबाहेक अरु विकल्प छैन।
एमनेष्टीका अनुसार यी दुई कम्पनीले प्रयोगकर्तासँग कुनै रकम नलिए पनि उपभोक्ताले आफ्नो व्यक्तिगत विवरण त्यसको मूूल्यको रुपमा चुकाइरहेका छन्। एमनेष्टीले मानिसको विवरणसँग सम्बन्धित सुरक्षा कानुन बनाएर ठूला प्रविधिजन्य कम्पनीलाई प्रभावकारी रुपमा नियमन गर्न पनि विश्वका सरकारसँग आग्रह गरेको छ।