नेपाली कांग्रेसका युवा नेता बाबुराजा चित्रकारले एनआरएनले नेपालको राजनीतिसहित सामाजिक जीवनमा महत्वपूर्ण भूमिका निर्वाह गरेको बताएका छन्।
एनआरएन जर्मनीको बार्षिक साधारणसभालाई अतिथिको रुपमा सम्बोधन गर्दै गणेशमान सिंह केन्द्रका अध्यक्षसमेत रहेका नेता चित्रकारले महाभूकम्पको बेलामा पबित्र मनले एनआरएनले गरेको सहयोग सबैका लागि प्रेरणादायी भएको बताए। नेपालको इतिहासमा लोकतन्त्र खोसिएको बेला पनि एनआरएनको भूमिका विशेष रहेको चित्रकारले बताए।
अब नेपालको स्थायी विकासमा एनआरएनलाई कसरी सहाभागी गराएर अघि बढ्ने भन्ने कुरामा सरकार गम्भीर हुनुपर्ने चित्रकारले बताए। नेपालमा विश्वभरका हिन्दुहरुको लागि पशुपतिनाथ, बौद्धमार्गीहरुका लागि लुम्बिनीसहित सर्वोच्च शिखर सगरमाथा पनि रहेकाले यी सबैको प्रचार प्रसारका लागि एनआरएनको भूमिका महत्वपूर्ण रहने उनले बताए।
वर्तमान सरकारले एनआरएनको माग सम्बोधन गरेर विदेशीलाई नेपाल भित्र्याउनुको सट्टा नेपालमा एन आरएनलाई प्रवेश गराउन सक्नु पर्ने धारणा उनको थियो। कार्यक्रमलाई जर्मनीका लागि नेपालका राजदूत रमेशप्रसाद खनाल, एनआरएनका पूर्व अध्यक्ष जीवा लामिछाने लगायतले सम्बोधन गरेका थिए।
