गैरआवासीय नेपाली संघ अफ्रिकाको तेस्रो क्षेत्रीय बैठक १२ बुँदे कम्पाला घोषणा पत्र जारी गर्दै सम्पन्न भएको छ। राजधानी कम्पालामा २ दिनसम्म चलेको बैठकमा अफ्रिका क्षेत्रका एक दर्जनभन्दा बढी मुलुकमा रहेका १ सय ५० बढी नेपालीको सहभागिता थियो।
बैठकले जारी गरेको घोषणा पत्रमा नेपालको पर्यटन, पूर्बाधार लगायतका क्षेत्रमा अफ्रिकासँगको सहकार्यका लागि पहल गर्न नेपाल सरकार र एनआरएनए अन्तर्राष्ट्रिय परिषद्लाई आग्रह गरिएको छ।
यसैगरी नेपालबाट अवैध बाटो हुँदै युरोप र अमेरिका प्रवेशको ट्रान्जिटको रुपमा अफ्रिकी मुलुक रहेकाले यस्ता काम रोक्नका लागि सचेतनामूलक कार्यक्रम सञ्चालन गर्न जोड दिइएको छ।
त्यस्तै बैधानिक बाटो हुँदै अफ्रिका आउँदा भारतको विमानस्थलमा कर्मचारीबाट हुने दुव्र्यबहार रोक्न र आवत जावतलाई सहज बनाउन नेपाल सरकारको पनि ध्यानकर्षण गरिएको छ।
यसैगरी नेपालीहरुको रोजगारीको गन्त्वय मुलुक इजिप्ट र दक्षिण अफ्रिकामामात्र नेपादी दूतावास हुँदा अप्ठेरो परेको भन्दै तत्काल अन्य देशमा पनि दूतावास खोल्नु पर्नेमा उनीहरुको जोड रहेको छ। राजदूत नियुक्त गर्नका लागि प्रक्रिया लामो हुने भएकाले अन्तरिम समस्या समाधानका लागि महावाणिज्यदूत छनौट गर्नु पर्नेमा जोड दिइएकाे छ।
एनआरएनएको पहलमा नेपालमा हुन लागेको एकीकृत लगानी सम्मेलनमा पनि अफ्रिकाबाट सहभागीता जनाउने घोषणा पत्रमा उल्लेख गर्दै त्यसको पहल गर्न युगाण्डा र अन्य अफ्रिकी सरकारलाई आग्रह पनि गरिएको छ।
नेपाल सरकारले अफ्रिकामा रोजगारीका लागि जाने वातावरण सहज बनाउन माग गर्दै व्यापार प्रवद्र्धन गर्न डीटीएए र बिप्पा जस्ता सन्धीका लागि पहल गर्नुपर्ने निष्कर्ष पनि निकालिएको छ।
त्यसअघि बैठकको उद्घाटन सत्रमा इजिप्टस्थित नेपाली राजदूत झबिन्द्र अर्याल तथा राष्टपतिका प्रतिनिधि युगाण्डा रेसिडेण्ट डिस्टिक्ट कमिस्नार हाइट हावानामुजेनी कम्पालानगर प्राधिकरण सम्बन्धी मन्त्रीबेटी काम्याना मिसाग्यो र युगाण्डा सरकारका पर्यटन राज्यमन्त्री किवाण्डा गोडीफ्रे स्सुवीलगायत युगाण्डा सरकारका बिभिन्न निकाय तथा संघ संस्थाका प्रतिनिधिहरुको उपस्थिति थियो।
