अमेरिकी विदेश मन्त्रालयले नेपालकी सुनिता दनुवारलाई सन् २०१८ को ‘टिप हिरो’ को रूपमा सम्मान गरेको छ।
नेपालमा मानव बेचबिखनविरुद्धको सङ्घर्षमा आफ्नो जीवन समर्पित गरेकी दनुवार सहित विश्वभरका १० व्यक्तिलाई सम्मान गरिएको थियो।
अमेरिकी विदेशमन्त्री माइकल आर. पोम्पेओ तथा अमेरिकी राष्ट्रपतिकी सल्लाहकार इभाङ्का ट्रम्पले उनीहरूलाई सम्मान गरेका हुन्।
वाशिङ्टन डी.सी.मा आयोजित अमेरिकी विदेश मन्त्रालयको मानव बेचबिखनसम्बन्धी वार्षिक प्रतिवेदन, २०१८ सार्वजनिक कार्यक्रममा बेचबिखनविरुद्ध काम गरिरहेकालाई सम्मान गरिएको हो।
नेपालभरका पीडित तथा जोखिममा रहेका समुदायहरूलाई सेवा गर्ने प्रतिबद्धताका लागि सुनीता दनुवारलाई सम्मानित गरिएको अमेरिकी विदेश मन्त्रालयले जनाएको छ।
दनुवार मानव बेचबिखनविरुद्ध सक्रिय गैसस शक्ति समूहकी सह-संस्थापक तथा कार्यकारी निर्देशकसमेत रहेकी छन्।
